આવકવેરા વિભાગે આવકવેરા રિટર્ન એટલે કે ITR ફાઇલ કરવાની છેલ્લી તારીખમાં વધુ એક દિવસનો વધારો કર્યો છે. તેથી ITR ફાઇલ કરવાની છેલ્લી તારીખ હવે 16 સપ્ટેમ્બર 2025 છે. અગાઉ આ તારીખ 15 સપ્ટેમ્બર નક્કી કરવામાં આવી હતી. જોકે, ITR ફાઇલ કરવાની પહેલી અંતિમ તારીખ 31 જુલાઈ 2025 હતી, જે પહેલાથી જ લંબાવવામાં આવી હતી.
આવકવેરા વિભાગ દ્વારા જાહેર કરાયેલ એક પ્રેસ રિલીઝમાં કહેવામાં આવ્યું હતું કે આવકવેરા રિટર્ન ફાઇલ કરવાની છેલ્લી તારીખ હવે એક દિવસ વધારીને 16 સપ્ટેમ્બર કરવામાં આવી છે. આવકવેરા ઈ-ફાઇલિંગ પોર્ટલ પર ટેકનિકલ સમસ્યાઓના કારણે રિટર્ન ફાઇલ કરવામાં મુશ્કેલીનો સામનો કરી રહેલા કરદાતાઓની સુવિધા માટે આ પગલું લેવામાં આવ્યું છે.
આવકવેરા વિભાગે એ પણ માહિતી આપી હતી કે ઈ-ફાઇલિંગ પોર્ટલ પર જરૂરી અપડેટ્સ અને ફેરફારો કરવા માટે 16 સપ્ટેમ્બરે બપોરે 12:00 થી 2:30 વાગ્યા મેઈન્ટેનન્સ કરવામાં આવશે.
કરદાતાઓને ITR ફાઇલ કરવાની તારીખ એક દિવસ લંબાવીને થોડી રાહત મળી છે. પરંતુ વિભાગે દરેકને સમયસર આવકવેરા રિટર્ન ફાઇલ કરવાની અપીલ કરી છે, જેથી છેલ્લી ઘડીએ ટેકનિકલ સમસ્યાઓ કે દંડ ટાળી શકાય.
સમયસર આવકવેરા રિટર્ન (ITR) ફાઇલ કરવું મહત્વપૂર્ણ છે જેથી વધારાના દંડથી બચી શકાય. આવકવેરા કાયદાની કલમ 234F હેઠળ જે કરદાતાઓ પાસે કર જવાબદારી હોય છે તેમને નિર્ધારિત સમયમર્યાદા પછી રિટર્ન ફાઇલ કરવા બદલ દંડ કરવામાં આવે છે. જો કરદાતાની કુલ આવક 5 લાખ રૂપિયાથી વધુ હોય તો આઈટીઆર ફાઈલ કરવામાં વિલંબ બદલ 5000 રૂપિયા સુધીનો દંડ લાદવામાં આવશે. જેમની આવક 5 લાખ રૂપિયાથી ઓછી છે તેમને 1,000 રૂપિયાનો દંડ ભરવો પડશે.
જો આવકવેરા રિટર્ન (ITR) સમયસર ફાઇલ ન કરવામાં આવે તો માત્ર દંડ જ નહીં પરંતુ ઘણી અન્ય સમસ્યાઓ પણ ઊભી થશે. કલમ 234A હેઠળ કર બાકી રકમ પર દર મહિને 1 ટકા વ્યાજ ચૂકવવાનું હોય છે. આ ઉપરાંત, રિટર્ન મોડા ભરવાથી પ્રક્રિયામાં પણ વધુ સમય લાગે છે અને રિફંડ મેળવવામાં પણ વિલંબ થાય છે. જો માહિતી છુપાવવામાં આવે અથવા ખોટી રીતે આપવામાં આવે તો આવકવેરા કાયદા હેઠળ જેલની સજા પણ થઈ શકે છે. ગંભીર કિસ્સાઓમાં 3 મહિનાથી 2 વર્ષ સુધીની સજાની જોગવાઈ છે.
આ પણ વાંચો, દહેરાદૂના સહસ્ત્રધારામાં વાદળ ફાટવાથી તબાહી, શિમલામાં ભૂસ્ખલન
