1 નવેમ્બરથી બદલાશે આ 5 મોટા નિયમો, તમારા ખિસ્સા પર પડશે સીધી અસર; ફટાફટ જાણી લો
જો તમે પણ તહેવારના કારણે કેટલાક કામો આગામી મહિના માટે પેન્ડિંગ રાખ્યા હોય, તો આ સમાચાર તમારા માટે ઉપયોગી થઈ શકે છે. ખરેખર, 1 નવેમ્બર 2025થી દેશભરમાં ઘણા મોટા નિયમોમાં ફેરફાર થવા જઈ રહ્યા છે. આ ફેરફારો તમારા ખિસ્સા, રોકાણ અને રોજિંદા જીવન પર સીધી અસર કરશે. આમાં આધાર કાર્ડ, બેંકિંગ સિસ્ટમ, ક્રેડિટ કાર્ડ, ગેસ સિલિન્ડર અને મ્યુચ્યુઅલ ફંડ સાથે સંબંધિત નિયમોનો સમાવેશ થાય છે. જો તમે આ અપડેટ્સથી અજાણ છો, તો તમને નુકસાન પણ ભોગવવું પડી શકે છે. ચાલો જાણીએ કે, 1 નવેમ્બરથી લાગુ થનારા આ 5 મોટા ફેરફારો કયા છે.
આધાર કાર્ડ અપડેટના નિયમો થયા સરળ – UIDAIએ આધાર કાર્ડ અપડેટ સાથે સંબંધિત પ્રક્રિયાને વધુ સરળ બનાવી દીધી છે. હવે તમારે નામ, સરનામું, જન્મ તારીખ જેવી માહિતી અપડેટ કરાવવા માટે આધાર કેન્દ્ર પર જવાની જરૂર નહીં રહે. આ બધું તમે ઓનલાઈન કરી શકશો. માત્ર બાયોમેટ્રિક વિગતો જેવી કે ફિંગરપ્રિન્ટ કે આઈરિસ સ્કેન માટે જ કેન્દ્ર પર જવું પડશે. નવી વ્યવસ્થામાં UIDAI તમારી માહિતીને પાન, પાસપોર્ટ, રાશન કાર્ડ, મનરેગા અને શાળાના રેકોર્ડ જેવા સરકારી ડેટાબેસમાંથી ઓટોમેટિક રીતે વેરિફાય કરશે. એટલે કે હવે ડોક્યુમેન્ટ અપલોડ કરવાની ઝંઝટ ખતમ થઈ જશે.
SBI ક્રેડિટ કાર્ડ પર વધશે ચાર્જ – જો તમારી પાસે SBIનું ક્રેડિટ કાર્ડ છે, તો આ ફેરફાર તમારા માટે ખૂબ મહત્વનો છે. 1 નવેમ્બરથી અનસિક્યોર્ડ કાર્ડ્સ પર 3.75% ચાર્જ લગાડવામાં આવશે. જો તમે CRED, CheQ કે Mobikwik જેવા થર્ડ-પાર્ટી એપ્સ દ્વારા શાળા કે કોલેજની ફી ભરો છો, તો તેના પર 1% વધારાનો ચાર્જ આપવો પડશે. જો કે, જો તમે શાળાની સત્તાવાર વેબસાઈટ કે તેના POS મશીન દ્વારા ચૂકવણી કરશો, તો કોઈ ચાર્જ લાગશે નહીં. આ ઉપરાંત, ₹1,000થી વધુની રકમ વોલેટમાં લોડ કરવા પર 1% ચાર્જ અને કાર્ડ દ્વારા ચેકની ચૂકવણી કરવા પર ₹200નો ચાર્જ આપવો પડશે.
મ્યુચ્યુઅલ ફંડ રોકાણકારો માટે નવા નિયમો – SEBIએ પારદર્શિતા વધારવા માટે મ્યુચ્યુઅલ ફંડ રોકાણ સાથે સંબંધિત નવા નિયમો લાગુ કર્યા છે. હવે જો કોઈ AMC (એસેટ મેનેજમેન્ટ કંપની)ના અધિકારી, કર્મચારી કે તેમના પરિવારના સભ્યો ₹15 લાખથી વધુનું ટ્રાન્ઝેક્શન કરે છે, તો કંપનીએ આ માહિતી તેના કમ્પ્લાયન્સ ઑફિસર (Compliance Officer)ને આપવી પડશે. આ પગલું રોકાણકારોના હિતોનું રક્ષણ કરવા અને ઇનસાઇડર ટ્રેડિંગને રોકવાના હેતુથી ભરવામાં આવ્યું છે.
બેંક એકાઉન્ટ અને લૉકરના નોમિની નિયમોમાં ફેરફાર – બેંકિંગ સિસ્ટમમાં પણ 1 નવેમ્બરથી મોટો ફેરફાર લાગુ થવા જઈ રહ્યો છે. હવે ગ્રાહકો તેમના બેંક એકાઉન્ટ, લૉકર અને સેફ કસ્ટડી માટે એક નહીં, પરંતુ ચાર નોમિની નિયુક્ત કરી શકશે. આ ફેરફાર બેંકિંગ લૉ (રિવિઝન) એક્ટ 2025 હેઠળ લાગુ કરવામાં આવી રહ્યો છે. ગ્રાહકો એ પણ નક્કી કરી શકશે કે કયા નોમિનીને કેટલો હિસ્સો મળશે. જો પ્રથમ નોમિનીનું અવસાન થાય, તો તેનો હિસ્સો આપોઆપ બીજા નોમિનીને ટ્રાન્સફર થઈ જશે. આનાથી ભવિષ્યમાં વિવાદોની શક્યતા ઘટશે અને પ્રક્રિયા પારદર્શી બનશે.
LPG, CNG અને PNGના ભાવમાં સંભવિત ફેરફાર – દર મહિનેની જેમ 1 નવેમ્બરે પણ LPG, CNG અને PNGના ભાવની સમીક્ષા કરવામાં આવશે. ઓઈલ કંપનીઓ આંતરરાષ્ટ્રીય બજારના ભાવના આધારે આ દરોમાં ફેરફાર કરે છે. આથી, આ વખતે પણ ગેસના ભાવમાં વધારો કે રાહત બંનેની શક્યતા છે.
