Donald Trump: ટેસ્લાના શેર ઘટતા ટ્રમ્પે કહ્યું: ‘હું ટેસ્લા કાર ખરીદીશ, કેટલાક લોકો મસ્કને નુકશાન પહોંચાડવા માંગે છે’
અમેરિકાના રાષ્ટ્રપતિ ડોનાલ્ડ ટ્રમ્પે જાહેરાત કરી છે કે તેઓ ટેસ્લા કાર ખરીદવા જઈ રહ્યા છે. તેમણે મંગળવારે કહ્યું કે આમ કરીને તેઓ ટેસ્લાના વડા અને DoGEના પ્રમુખ ઈલોન મસ્ક પ્રત્યે વિશ્વાસ અને સમર્થન દર્શાવવા માંગે છે. તેમણે સોશિયલ મીડિયા પોસ્ટમાં મસ્કને એક મહાન અમેરિકન પણ કહ્યા. આનો જવાબ મસ્કે ‘થેન્ક્યૂ પ્રેસિડેન્ટ’ લખીને આપ્યો હતો.
ખરેખરમાં, સોમવારે ટેસ્લાના શેરમાં 15%નો જંગી ઘટાડો થયો, જે સપ્ટેમ્બર 2020 પછી કંપનીનો સૌથી મોટો એક દિવસીય નુકસાન છે. 2025માં ટેસ્લાના શેર અત્યાર સુધીમાં 45% ઘટ્યા છે, જેના કારણે નવેમ્બરમાં ટ્રમ્પ ફરીથી ચૂંટણી જીત્યા પછી કંપનીએ મેળવેલા ફાયદાને ખતમ કર્યા છે. જાન્યુઆરીથી મસ્કની કુલ સંપત્તિમાં પણ 130 બિલિયન ડોલરનો ઘટાડો થયો છે.
ટ્રમ્પે પોતાના સોશિયલ મીડિયા પ્લેટફોર્મ ટ્રુથ સોશિયલ પર લખ્યું – ‘હું બધા રિપબ્લિકન, કન્ઝર્વેટિવ અને બધા અમેરિકનોને કહેવા માંગુ છું કે ઈલોન મસ્ક આપણા દેશને મદદ કરવા માટે પોતાનો જીવ દાવ પર લગાવી રહ્યા છે અને તેઓ ખૂબ સારું કામ કરી રહ્યા છે.’ ટેસ્લા વિશ્વની શ્રેષ્ઠ કાર ઉત્પાદક કંપનીઓમાંની એક છે અને તે ઈલોનના ‘બાળક’ સમાન છે. પરંતુ પાગલ કટ્ટર ઉગ્રવાદી ડાબેરીઓ હંમેશાની જેમ, આ વખતે પણ ગેરકાયદેસર રીતે ટેસ્લાનો બહિષ્કાર કરવાનો પ્રયાસ કરી રહ્યા છે જેથી તેઓ ઈલોનને નુકસાન પહોંચાડી શકે.
ટ્રમ્પે કહ્યું કે 2024ની ચૂંટણીમાં મારી સાથે પણ આવું જ કરવાનો પ્રયાસ કરવામાં આવ્યો હતો. પણ તેનું પરિણામ શું આવ્યું? ગમે તે હોય, આવતીકાલે હું એક નવી ટેસ્લા કાર ખરીદીશ અને ઈલોન પ્રત્યે મારો વિશ્વાસ અને સમર્થન બતાવીશ. તેઓ ખરેખરમાં મહાન અમેરિકન છે. તેઓ અમેરિકાને ફરીથી મહાન બનાવવા માટે પોતાની સંપૂર્ણ કુશળતાનો ઉપયોગ કરી રહ્યા છે, તેમને શા માટે સજા મળવી જોઈએ?
ટ્રમ્પ વહીવટમાં ઈલોન મસ્કની ભૂમિકા સામે અમેરિકામાં વિરોધ પ્રદર્શનો ચાલુ છે. દેશભરમાં ટેસ્લા ફેક્ટરીઓ અને સેવા કેન્દ્રોની બહાર વિરોધ પ્રદર્શનો થઈ રહ્યા છે. આ કારણે કારના વેચાણમાં ઘટાડો થયો છે. મસ્કના DoGE વિભાગના સરકારી નોકરીઓ અને બજેટમાં કાપ મૂકવાના નિર્ણયથી ગુસ્સે ભરાયેલા લોકો ટેસ્લાના શોરૂમની બહાર ઉભા રહીને ‘ઈલોન મસ્ટ ગો બેક’ જેવા નારા લગાવી રહ્યા છે.
ઈલોન મસ્કના રાજકીય વલણો પણ ટેસ્લાના વેચાણ પર અસર કરી રહ્યા છે. જર્મનીની ફેબ્રુઆરીની ચૂંટણી પહેલા મસ્કે અલ્ટરનેટિવ ફોર જર્મની પાર્ટીને સમર્થન આપ્યું હતું, જેના કારણે 2024 ના પ્રથમ બે મહિનામાં ટેસ્લા ગાડીઓના રજીસ્ટ્રેશનમાં 70% ઘટાડો થયો હતો.
આ પણ વાંચો, Jharkhand: પલામુમાં ગેંગસ્ટર અમન સાહુનું એન્કાઉન્ટર, પોલીસની રાયફલ છીનવીને ભાગવાની કોશિશ કરી હતી