વર્લ્ડ કપ વિજેતા કેપ્ટન હરમનપ્રીત કૌરે અચાનક પદ છોડ્યું! સફળતાના શિખર પર પહોંચ્યા બાદ સુવર્ણ યુગનો અંત

ભારતીય મહિલા ક્રિકેટ ટીમની વર્લ્ડ કપ વિજેતા કેપ્ટન હરમનપ્રીત કૌરે મંગળવાર, ઓક્ટોબર 6 ના રોજ ટીમની કપ્તાની છોડવાની જાહેરાત કરી છે. હરમનપ્રીતનો આ નિર્ણય તાજેતરમાં જ ભારતને એશિયન ગેમ્સ 2026 માં ગોલ્ડ મેડલ અપાવ્યા બાદ સામે આવ્યો છે. આ નિર્ણયથી સ્પષ્ટ થઈ ગયું છે કે હરમનપ્રીત હવે રમતના તમામ ફોર્મેટમાં ભારતની કેપ્ટનશિપ પદ પરથી હટી ગઈ છે. જોકે તે ખેલાડી તરીકે ટીમ સાથે જોડાયેલી રહેશે.

હરમનપ્રીતે સોશિયલ મીડિયા પ્લેટફોર્મ ઇન્સ્ટાગ્રામ પર એક લાંબી પોસ્ટ શેર કરીને આ નિર્ણયની સત્તાવાર જાહેરાત કરી હતી. તેમણે જણાવ્યું કે આ નિર્ણય લેવો તેમના માટે જરાય સરળ નહોતો, કારણ કે આ ભૂમિકા સાથે તેમની વર્ષોની યાદો, ભાવનાઓ અને અનેક બલિદાનો જોડાયેલા છે. તેમણે સ્પષ્ટ કર્યું કે ટીમ હંમેશાં સર્વોપરી રહે તે માટે તેમણે ઘણીવાર પોતાની અંગત મહત્ત્વાકાંક્ષાઓને બાજુ પર રાખી હતી.

37 વર્ષીય હરમનપ્રીતે સૌપ્રથમ 2012 માં હંગામી ધોરણે કપ્તાની સંભાળી હતી અને ભારતને મહિલા T20 એશિયા કપ જીતાડ્યો હતો. ત્યારબાદ ૨૦૧૬ માં તેમને કાયમી કેપ્ટન બનાવવામાં આવ્યા હતા, જેનાથી ભારતીય મહિલા ક્રિકેટમાં એક સુવર્ણ યુગની શરૂઆત થઈ હતી. તેમના નેતૃત્વમાં ટીમ અનેક ઐતિહાસિક વિજયોની સાક્ષી બની છે.

પોતાના નિવેદનમાં હરમનપ્રીતે કહ્યું કે, “હું આજે શાંતિપૂર્ણ મન સાથે કેપ્ટનશિપ છોડી રહી છું, કારણ કે મને પૂરો વિશ્વાસ છે કે મારી ટીમ એક સારી સ્થિતિમાં છે. આ ટીમમાં અદ્ભુત પ્રતિભા, પાત્ર અને ઉજ્જવળ ભવિષ્ય છે.” તેમણે તમામ સાથી ખેલાડીઓ, કોચ, સપોર્ટ સ્ટાફ, બીસીસીઆઈ (BCCI) અને ચાહકોનો આભાર માન્યો હતો. તેમણે ઉમેર્યું કે હવે કેપ્ટનશિપનો અંત આવ્યો છે, પરંતુ ક્રિકેટ પ્રત્યેનો તેમનો પ્રેમ હંમેશાં જળવાઈ રહેશે.