અમેરિકાએ 24 કલાકમાં ઈરાનમાં બીજી વખત કર્યો મોટો હુમલો, ડ્રોન સાઈટ્સ અને સૈન્ય ઠેકાણાને બનાવ્યા નિશાન

અમેરિકાએ ફરી એકવાર ઈરાનમાં મોટો હુમલો કર્યો છે. 24 કલાકમાં બીજી વખત અમેરિકાએ શનિવારે હોર્મુઝ સ્ટ્રેટ નજીક ઈરાની લક્ષ્યો પર હવાઈ હુમલો કર્યો. યુએસ સેન્ટ્રલ કમાન્ડ (સેન્ટકોમ) એ જણાવ્યું હતું કે, રાષ્ટ્રપતિ ડોનાલ્ડ ટ્રમ્પના નિર્દેશ પર અમેરિકન સૈન્યએ ઈરાનના મિલિટ્રી સર્વિલાન્સ ઈન્ફ્રાસ્ટ્રક્ચર, કમ્યુનિકેશન સિસ્ટમ્સ, એર ડિફેન્સ સાઈટ્, ડ્રોનના ભંડાર અને સમુદ્રી માઈન્સની ક્ષમતાઓને નિશાન બનાવી હતી.

ઈરાનના રાજ્ય મીડિયા IRIB એ લશ્કરી સ્ત્રોતને ટાંકીને અહેવાલ આપ્યો છે કે દક્ષિણ શહેર સિરિક નજીક વિસ્ફોટો સંભળાયા હતા. ઘણા પ્રોજેક્ટાઇલ એક ટેલિકોમ્યુનિકેશન ટાવર પર અથડાયા. જોકે વધુ વિગતો તાત્કાલિક આપવામાં આવી નથી.

શુક્રવારે અમેરિકાએ ઈરાનની અંદર પણ મોટો હુમલો કર્યો હતો. આશ્ચર્યજનક રીતે વોશિંગ્ટન અને તેહરાન વચ્ચે તાજેતરમાં યુદ્ધવિરામ પર સંમતિ થઈ હતી. અમેરિકાના આ પગલાથી બંને દેશો વચ્ચે તણાવ ફરી વધ્યો છે.

અમેરિકાએ આરોપ લગાવ્યો છે કે ઈરાને શનિવારે વહેલી સવારે વન-વે અટેક ડ્રોન મારફતે પનામાના ધ્વજવાળા તેલ ટેન્કર એમ/ટી કિકુ પર હુમલો કરીને યુદ્ધવિરામનો ભંગ કર્યો હતો. સેન્ટકોમના જણાવ્યા અનુસાર, આ ટેન્કર બે મિલિયન બેરલથી વધુ ક્રૂડ તેલ લઈને હોર્મુઝ સ્ટ્રેટ નજીકથી પસાર થઈ રહ્યું હતું ત્યારે તેના પર હુમલો કરવામાં આવ્યો. અમેરિકન સૈન્યનું કહેવું છે કે શુક્રવારની કાર્યવાહી પછી ઈરાનને યુદ્ધવિરામનું પાલન કરવાની તક આપવામાં આવી હતી પરંતુ તણાવ ઓછો કરવાને બદલે તેણે નવા હુમલા સાથે પરિસ્થિતિને વધુ ખરાબ કરી હતી.