ટાઈગર શ્રોફ પર ગોળીબાર, હાથ અને છાતી પર ઈજા:બે હુમલાખોરોના CCTV ફોટા સામે આવ્યા

મુંબઈમાં ફાયરિંગની ઘટના બાદ એક્ટર ટાઈગર શ્રોફની તસવીરો સામે આવી છે. તેમની હાથ અને છાતી પર પટ્ટીઓ બાંધેલી દેખાઈ રહી છે. 3 અજાણ્યા આરોપીઓ વિરુદ્ધ FIR નોંધાઈ છે. ટાઈગરની કાર પર રવિવારે સાંજે જુહૂ વિસ્તારમાં 5 રાઉન્ડ ફાયરિંગ કરનારા આરોપીઓની પણ તસવીર સામે આવી છે. તેમાં બે યુવકો સફેદ શર્ટ પહેરેલા દેખાઈ રહ્યા છે. એકે કાળી કેપ પહેરી છે. જોકે, આ તસવીર ક્યાંની અને ક્યારની છે, તે હજુ સ્પષ્ટ નથી. ઘટનામાં ઉપયોગમાં લેવાયેલી બાઈક પણ મળી આવી છે. પોલીસના જણાવ્યા મુજબ આરોપીઓ ફાયરિંગ કર્યા બાદ પોતાની બાઈક અંધેરી વેસ્ટ રેલવે સ્ટેશનની બહાર છોડીને ભાગી ગયા. લૉરેન્સ ગેંગના અનિલ પંડિતે ફાયરિંગની જવાબદારી લીધી છે. એક્ટરના ડ્રાઈવર ફિરદૌસને ગોળી વાગી છે. ઉમેશ ચવાણ નામનો એક વ્યક્તિ પણ ઘાયલ થયો છે. તેની હાલત ગંભીર હોવાનું જણાવાઈ રહ્યું છે. મોડી રાત્રે ટાઈગરને મળવા પહોંચેલા ડેપ્યુટી સીએમ શિંદેએ જણાવ્યું કે એક્ટરના હાથમાં ગન પાવડર અને કાચના ટુકડાઓથી ઈજા થઈ છે.

મહારાષ્ટ્રના મુખ્યમંત્રી દેવેન્દ્ર ફડણવીસે ઘટનાને લઈને કહ્યું, “આ ઘટનાથી જોડાયેલા દરેક પાસાની તપાસ અને વિશ્લેષણ કરવામાં આવશે. જે પણ જરૂરી હશે, તે પગલાં લેવામાં આવશે. મારું માનવું છે કે મુંબઈ પોલીસને એક અત્યંત વ્યાવસાયિક પોલીસ દળ તરીકે ઓળખવામાં આવે છે. આવી ઘટના બાદ તેઓ તમામ જરૂરી પગલાં લેશે.”

રવિવાર સાંજે 7 વાગ્યે ટાઈગરની કાર જુહુના પુષ્પા પાર્કમાં પહોંચે છે. કારમાં ટાઈગર આગળની સીટ પર બેઠા હતા અને ડ્રાઈવર ગાડી ચલાવી રહ્યો હતો. આ દરમિયાન ત્યાં શૂટર્સે ગોળીબાર શરૂ કરી દીધો.

શૂટર્સે ટાઇગર શ્રોફની કારને નિશાન બનાવીને 5 રાઉન્ડ ફાયરિંગ કર્યું. અચાનક થયેલા ફાયરિંગથી ઘટનાસ્થળે અફરાતફરી મચી ગઈ.

ફાયરિંગ દરમિયાન ટાઇગરનો ડ્રાઇવર ગોળી વાગવાથી ઘાયલ થયો. ત્યારબાદ તે ગાડીમાંથી બહાર નીકળી આવ્યો. ડ્રાઇવર ઘાયલ થયા બાદ ગાડી ચલાવવાની જવાબદારી ટાઇગરે પોતે સંભાળી.

ડ્રાઇવર ગાડીમાંથી બહાર નીકળ્યા બાદ ટાઇગર શ્રોફ ફ્રન્ટ સીટ પરથી ડ્રાઇવિંગ સીટ પર આવી ગયા. તેમણે પોતે ગાડીનું સ્ટિયરિંગ સંભાળ્યું.એક્ટર ઘાયલ ડ્રાઇવરને પણ કારમાં લઈને પોતે ગાડી ચલાવતા હોસ્પિટલ પહોંચ્યા. ત્યાં તેમણે ડ્રાઇવરને દાખલ કરાવ્યો અને પોતાના હાથની ડ્રેસિંગ પણ કરાવી.

પોલીસને શંકા છે કે હુમલાખોરોએ ફાયરિંગ પહેલાં ટાઇગર શ્રોફની રેકી કરી હતી. અભિનેતા દર રવિવારે લગભગ બે કલાક ફૂટબોલ રમવા માટે પુષ્પા નરસી પાર્ક આવે છે. પોલીસને આશંકા છે કે હુમલાખોરોને તેમની આ દિનચર્યાની જાણકારી હતી અને તેઓ પાર્કના ગેટની બહાર તેમની રાહ જોઈ રહ્યા હતા.

રવિવારે જ્યારે ટાઇગર ફૂટબોલ રમીને પરત ફરી રહ્યા હતા, ત્યારે તેમની કાર જુહુના પુષ્પા નરસી પાર્ક પાસે રોકાઈ. તેમને જોવા માટે ત્યાં ભીડ એકઠી થઈ હતી. તે દરમિયાન બાઇક પર સવાર ત્રણ લોકો ત્યાં પહોંચ્યા અને ટાઇગરની કાર પર 5 રાઉન્ડ ફાયરિંગ કર્યું. ઘટના જુહુ પોલીસ સ્ટેશનથી માત્ર 350 મીટર દૂર બની હતી.

ઇન્ડિયન એક્સપ્રેસના અહેવાલ મુજબ, પોલીસને શંકા છે કે હુમલાખોરોએ ફાયરિંગ પહેલાં ટાઇગર શ્રોફની રેકી કરી હતી. અભિનેતા દર રવિવારે લગભગ બે કલાક ફૂટબોલ રમવા માટે પુષ્પા નરસી પાર્ક આવે છે. પોલીસને આશંકા છે કે હુમલાખોરોને તેમની આ દિનચર્યાની જાણકારી હતી અને તેઓ પાર્કના ગેટની બહાર તેમની રાહ જોઈ રહ્યા હતા.મુંબઈ પોલીસના જણાવ્યા અનુસાર, ગોળીબારમાં સામેલ ત્રણ આરોપીઓ ઘટનામાં ઉપયોગમાં લેવાયેલી બાઈક અંધેરી રેલવે સ્ટેશન પર છોડીને ફરાર થઈ ગયા. પોલીસે બાઈક જપ્ત કરી લીધી છે અને તેના રજિસ્ટ્રેશન તથા ચેસિસ નંબરની તપાસ કરી રહી છે.

આરોપીઓની ગતિવિધિઓનો પતો લગાવવા માટે CCTV ફૂટેજ પણ તપાસવામાં આવી રહ્યા છે. જુહૂ પોલીસે ત્રણ અજાણ્યા લોકો વિરુદ્ધ કેસ નોંધ્યો છે. મામલો ભારતીય ન્યાય સંહિતા (BNS)ની કલમ 109(1), 3(5) અને આર્મ્સ એક્ટ હેઠળ નોંધવામાં આવ્યો છે.