ટી-20 વર્લ્ડ કપ 2026: ટીમ ઇન્ડિયાની ઐતિહાસિક જીત, ન્યૂઝીલેન્ડને 96 રનથી કચડ્યું

 અમદાવાદના વિશ્વવિખ્યાત નરેન્દ્ર મોદી સ્ટેડિયમ ખાતે રમાયેલી ટી-20 વર્લ્ડ કપ 2026 ની મહામુકાબલાની ફાઇનલમાં ટીમ ઇન્ડિયાએ ન્યૂઝીલેન્ડને 96 રનથી ધૂળ ચટાડીને ઐતિહાસિક જીત મેળવી છે. આ ભવ્ય વિજય સાથે ભારતે પોતાનો દબદબો જાળવી રાખીને સતત બીજી વખત વર્લ્ડ કપનો ખિતાબ પોતાના નામે કર્યો છે. ઘરઆંગણે રમીને આ ટુર્નામેન્ટ જીતનાર ભારત વિશ્વની પહેલી ટીમ બની ગઈ છે. ભારતીય ખેલાડીઓએ રમતનાં દરેક પાસામાં શ્રેષ્ઠ પ્રદર્શન કરીને આ મેચને એકતરફી બનાવી દીધી હતી અને વિશાળ 255 રનનો સ્કોર ઊભો કરીને કીવી ટીમને માત્ર 159 રનમાં સમેટી લીધી હતી.

મેચની શરૂઆતમાં ટોસ હાર્યા બાદ ભારતીય ટીમને પહેલા બેટિંગ કરવાનું આમંત્રણ મળ્યું હતું. યુવા ઓપનર અભિષેક શર્મા અને અનુભવી સંજુ સેમસને પહેલી વિકેટ માટે 98 રનની જબરદસ્ત ભાગીદારી નોંધાવીને મોટા સ્કોરનો પાયો નાખ્યો હતો. અભિષેકે માત્ર 21 બોલ રમીને છ ચોગ્ગા અને ત્રણ છગ્ગાની મદદથી આક્રમક 52 રન ફટકાર્યા હતા. બીજી તરફ, સંજુ સેમસને પણ કીવી બોલરોનો પરસેવો છોડાવી દીધો હતો. તેણે 46 બોલમાં પાંચ ચોગ્ગા અને આઠ ગગનચુંબી છગ્ગા ફટકારીને 89 રન બનાવ્યા હતા. જોકે તે પોતાની સદીથી થોડા માટે ચૂકી ગયો હતો.

256 રનના વિશાળ લક્ષ્યાંકનો પીછો કરવા ઉતરેલી ન્યૂઝીલેન્ડની ટીમ શરૂઆતથી જ ખૂબ જ દબાણમાં જોવા મળી હતી. ટિમ સીફર્ટ અને ફિન એલને શરૂઆતમાં થોડી આક્રમકતા બતાવીને 31 રન જોડ્યા, પરંતુ પહેલી વિકેટ પડતાની સાથે જ આખી ટીમ પત્તાના મહેલની જેમ ધરાશાયી થઈ ગઈ હતી. કીવી ટીમ તરફથી માત્ર ટિમ સીફર્ટે થોડો સંઘર્ષ કર્યો હતો અને 26 બોલમાં બે ચોગ્ગા તેમજ પાંચ છગ્ગા સાથે 52 રન બનાવ્યા હતા. ન્યૂઝીલેન્ડની અડધી ટીમ તો માત્ર 72 રનના નજીવા સ્કોર પર પેવેલિયન ભેગી થઈ ગઈ હતી. તેમના સાત ખેલાડીઓ ડબલ ફિગર સુધી પણ પહોંચી શક્યા ન હતા. કેપ્ટન મિશેલ સેન્ટનરે 35 બોલમાં 43 રન અને ડેરિલ મિશેલે 11 બોલમાં 17 રન બનાવીને હારનું અંતર ઘટાડવાનો પ્રયાસ કર્યો હતો, પરંતુ આખી ટીમ 19 ઓવરમાં માત્ર 159 રન પર જ સમેટાઈ ગઈ હતી.

ભારતીય બોલરોએ મેદાનમાં પોતાની ફિરકી અને ઝડપનો એવો જાદુ ચલાવ્યો કે મહેમાન ટીમ પાસે કોઈ જવાબ ન હતો. જસપ્રીત બુમરાહે પોતાની ઘાતક બોલિંગથી ન્યૂઝીલેન્ડના બેટ્સમેનોની કમર તોડી નાખી હતી અને સૌથી વધુ 4 વિકેટ પોતાના નામે કરી હતી. આ ઉપરાંત સ્પિનર અક્ષર પટેલે પણ શાનદાર બોલિંગ કરતા 3 મહત્વપૂર્ણ વિકેટ ઝડપી હતી. ફાઇનલ મુકાબલામાં 96 રનથી મળેલો આ વિજય ટી-20 વર્લ્ડ કપના ઇતિહાસમાં રનની દ્રષ્ટિએ સૌથી મોટી જીત છે. આ ભવ્ય જીત સાથે જ આખા દેશમાં દિવાળી જેવો માહોલ છવાઈ ગયો હતો.

https://www.instagram.com/timenewsguj

https://www.youtube.com/@INTIMENEWSCHANNEL

આ પણ વાંચો:‘ચેમ્પિયન્સ!’ T20 વર્લ્ડ કપમાં ઐતિહાસિક વિજય બદલ PM મોદીએ ટીમ ઈન્ડિયાને અભિનંદન પાઠવ્યા