લોસ એન્જલસમાં આગથી પેરિસ હિલ્ટન સહિત અનેક હસ્તીઓના બંગલાઓ થયા રાખ, હોટલમાં વિતાવવી પડી રાત

 અમેરિકાના કેલિફોર્નિયાના લોસ એન્જલસમાં લાગેલી ભીષણ આગ ભારે તબાહી મચાવી રહી છે. આગમાં અત્યાર સુધીમાં ઓછામાં ઓછા પાંચ લોકોના મોત થયા છે અને 1,000થી વધુ ઇમારતો બળીને રાખ થઈ ગઈ છે. લોસ એન્જલસ હોલિવૂડ સેલિબ્રિટીઓનું ઘર તરીકે જાણીતું છે. આવી સ્થિતિમાં આગના કારણે હોલિવૂડ સ્ટાર્સને પણ નુકસાન થયું છે. આગને કારણે હજારો લોકોને પોતાના ઘર અને દુકાનો છોડીને ભાગવું પડ્યું. બગડતી પરિસ્થિતિને ધ્યાનમાં રાખીને કેલિફોર્નિયાના ગવર્નર ગાવિન નિવસમે કટોકટીની સ્થિતિ જાહેર કરી છે.

હોલિવૂડ સ્ટાર પેરિસ હિલ્ટનનું ઘર પણ આગની ઝપેટમાં આવી ગયું છે. પેરિસ હિલ્ટને લાઇવ ટીવી પર માલિબૂમાં આવેલું પોતાનું ઘર સળગતું જોયું હતું.

પેરિસ હિલ્ટને તેનો વીડિયો તેના એક્સ એકાઉન્ટ પર શેર કર્યો છે અને એક લાંબી પોસ્ટ પણ લખી છે. આ પોસ્ટમાં પેરિસ હિલ્ટને આ ઘર સાથે જોડાયેલી પોતાની યાદો શેર કરી છે અને કહ્યું છે કે આ બધું જોઈને તેનું હૃદય તૂટી ગયું છે. તેણીએ એક રડતું ઇમોજી પણ ઉમેર્યું છે, જે દર્શાવે છે કે આ અકસ્માતને કારણે તે અંદરથી તૂટી ગઈ છે.૪૩ વર્ષીય પેરિસ હિલ્ટને X પર પોતાના પાળતું કૂતરાઓનો એક વીડિયો શેર કર્યો, જેમાં તે પોતાની કારમાં પાછળની સીટ પર બેસી આરામ કરી રહ્યા છે. હિલ્ટન આ ખતરનાક પરિસ્થિતિમાંથી બહાર નીકળીને હોટેલ જવા માટે પોતાનો સામાન પેક કરી રહી હતી.