શેરબજારમાં ભારે ઉથલપાથલ! ખુલતા જ સેન્સેક્સ 700થી વધુ પોઈન્ટ તૂટ્યો

આજે ભારતીય શેરબજારમાં મોટો ઘટાડો જોવા મળી રહ્યો છે. બજાર ખુલતાની સાથે જ BSEનો 30-શેરનો બેન્ચમાર્ક ઈન્ડેક્સ  ‘સેન્સેક્સ’ 700થી વધુ પોઈન્ટના ઘટાડા સાથે 73,172ના સ્તરે પહોંચી ગયો હતો. બીજી તરફ, NSE નિફ્ટીમાં 219 પોઈન્ટનો ઘટાડો થયો અને તે 22,991ના સ્તર પર આવી ગયો. આ ઘટાડાને કારણે, BSE પર લિસ્ટેડ કંપનીઓનું માર્કેટ કેપિટલાઇઝેશન માત્ર થોડી જ મિનિટોમાં ₹4,81,88,998.45 કરોડથી ઘટીને ₹4,77,59,117.49 કરોડ થઈ ગયું હતું.

અમેરિકી પ્રમુખ ડોનાલ્ડ ટ્રમ્પે ઈરાનના સાત દિવસના કરારને ફગાવી દેવાને કારણે આજે કાચા તેલની કિંમતોમાં ફરીથી વધારો જોવા મળી રહ્યો છે. આજે આંતરરાષ્ટ્રીય બેંચમાર્ક બ્રિન્ટ ક્રૂડનો ભાવ લગભગ 1.5% થી 2% ના વધારા સાથે 105.64 થી 106.20 ડોલર પ્રતિ બેરલની રેન્જમાં પહોંચી ગયો છે. બીજી તરફ, અમેરિકી વેસ્ટ ટેક્સાસ ઈન્ટરમીડિએટમાં પણ 1.1% થી વધુની મજબૂતી જોવા મળી રહી છે અને તે 93.40 થી 93.55 ડોલર પ્રતિ બેરલના સ્તર પર કારોબાર કરી રહ્યો છે.

ઈરાને પોતાના આ પ્રસ્તાવમાં શરત મૂકી હતી કે જો અમેરિકા ઈરાની બંદરો પરથી નૌકાદળની નાકેબંધી હટાવી લે, તો તેના બદલામાં તે મહત્વપૂર્ણ શિપિંગ રૂટ હોર્મુઝ (Strait of Hormuz) ને કમર્શિયલ જહાજોની અવરજવર માટે ફરીથી ખોલી દેશે. જોકે, ટ્રમ્પે તેને મંજૂરી આપી નથી. ટ્રમ્પના આ નિર્ણયની સાથે જ સપ્લાયમાં અવરોધ આવવાની અને ભવિષ્યમાં તેલની કિંમતો વધવાની આશંકા વધુ વધી ગઈ છે. ઘટાડાનું બીજું કારણ વિદેશી રોકાણકારો (FIIs) ની સતત વેચવાલી અને અમેરિકી વ્યાજદરોનું દબાણ પણ છે.

આજે કારોબાર દરમિયાન સૌથી વધુ વેચવાલી બેંકિંગ, FMCG અને રિયલ્ટી શેરોમાં જોવા મળી રહી છે. ટોપ લૂઝરમાં HDFC બેંક, બજાજ ફાઇનાન્સ અને સ્ટેટ બેંક સામેલ રહ્યા. આ ઘટાડો એટલો મોટો છે કે 16 માંથી 14 સેક્ટર્સ લાલ નિશાનમાં કારોબાર કરતા જોવા મળી રહ્યા છે. સાથે જ મિડકેપ અને સ્મોલકેપ ઈન્ડેક્સ પણ 0.2% સુધી નીચે આવી ગયા છે.

તેના કારણે બોમ્બે સ્ટોક એક્સચેન્જ (BSE) પર લિસ્ટેડ તમામ કંપનીઓના ટોટલ માર્કેટ કેપિટલાઇઝેશન (Mcap) ને થોડી મિનિટોમાં જ લગભગ 4,29,881 કરોડ (લગભગ 4.3 લાખ કરોડ) નું નુકસાન પહોંચ્યું છે. સત્તાવાર આંકડાઓ અનુસાર, બજાર ખુલવાના થોડા જ સમયની અંદર માર્કેટ કેપ 4,81,88,998.45 કરોડથી ઘટીને 4,77,59,117.49 કરોડના સ્તર પર આવી ગયું છે.