દિવાળી પહેલા ગ્રાહકોને લાગશે ઝટકો! 1 ઓક્ટોબરથી મોંઘા થઈ જશે AC, ફ્રિજ, TV અને વોશિંગ મશીન

1 ઓક્ટોબરથી એસી, ફ્રિજ, ટીવી અને વોશિંગ મશીન સહિત અન્ય પ્રોડક્ટ્સ મોંઘા થઈ જશે. કોપર, સ્ટીલ અને અન્ય પ્રોડક્ટ્સની કિંમતોમાં તેજી અને પશ્ચિમ એશિયામાં ચાલી રહેલા સંઘર્ષના કારણે કરન્સીમાં ઉતાર-ચઢાવથી કંપનીઓ આ પ્રોડક્ટ્સની કિંમતો 5 થી 8 ટકા સુધી વધારવા જઈ રહી છે.

કેલેન્ડર વર્ષ 2026 માં આ ત્રીજી વખત છે જ્યારે કંપનીઓ કિંમતો વધારવા જઈ રહી છે. કંપનીઓ એર-કંડિશનરની કિંમતો 5 થી 8 ટકા વધારવાની છે જ્યારે અન્ય કંપનીઓએ વોશિંગ મશીન, રેફ્રિજરેટર અને એલઇડીની કિંમતોમાં 3-4 ટકા વધારો કરવાનો નિર્ણય લીધો છે.જોકે, કેટલીક કંપનીઓને ડર છે કે આ વધારાથી તહેવારોની માંગ પર અસર પડી શકે છે, જ્યારે અન્ય કેટલીક કંપનીઓનું માનવું છે કે કિંમતોમાં વધારાની અસર વેચાણ પર ખૂબ ઓછી થશે, કારણ કે ડીલરો અને ડિસ્ટ્રીબ્યુટરોએ ઓગસ્ટ અને સપ્ટેમ્બરમાં પહેલાથી બુકિંગ દ્વારા જૂની કિંમતો પર ખરીદેલી ઇન્વેન્ટરી પહેલાથી જ સ્ટોક કરી લીધી છે.

કયા બ્રાન્ડ્સના વધશે ભાવ?

બ્લુ સ્ટાર, ગોદરેજ એપ્લાયન્સિસ, હાયર, ડાઇકિન અને સુપર પ્લાસ્ટ્રોનિક્સે પહેલાથી જ અલગ-અલગ કેટેગરીમાં 4 થી 10 ટકા સુધી કિંમતોમાં વધારાની જાહેરાત કરી દીધી છે. જોકે, પેનાસોનિકે કહ્યું છે કે તે કોઈપણ વધારા પર નિર્ણય લેતા પહેલા તમામ પરિસ્થિતિઓનું મૂલ્યાંકન કરી રહી છે. સૂત્રોના જણાવ્યા અનુસાર, એલજી અને બોશ હોમ કમ્ફર્ટ (જેની પાસે હિતાચી બ્રાન્ડેડ એર કંડિશનરની માલિકી છે) એ પણ એસીની કિંમતોમાં લગભગ 5 ટકાનો વધારો કરી દીધો છે.

કેટલી વધશે કિંમતો?

3 થી 4 કિલો કોપરની જરૂરિયાત હોય છે એક એર કંડિશનરમાં. હાયર ઇન્ડિયાના પ્રેસિડેન્ટ એનએસ સતીશે કહ્યું કે કોપરની કિંમતો ગયા વર્ષે 8,000-9,000 ડોલર પ્રતિ મેટ્રિક ટન હતી, પરંતુ હવે તે 14,500 ડોલર મેટ્રિક ટન સુધી પહોંચી ગઈ છે અને તેમાં વધારો ચાલુ રહેવાની આશા છે. તેમણે કહ્યું કે એક એર-કંડિશનર માટે 3 થી 4 કિલો કોપરની જરૂર હોય છે. તેમણે એ પણ કહ્યું કે જો ઇનપુટ કોસ્ટ આ જ રીતે વધતી રહેશે તો દિવાળી પછી અને જાન્યુઆરીમાં ફરીથી કિંમતો વધી શકે છે. કોમોડિટીની કિંમતોમાં 8-10 ટકાના વધારા પછી ઇન્ડસ્ટ્રીમાં કિંમતોમાં વધારાનો એક વધુ રાઉન્ડ જરૂરી બની ગયો છે. સમય અલગ-અલગ બ્રાન્ડ મુજબ અલગ હોઈ શકે છે.

કેમ વધી રહી છે કિંમત?

બ્લુ સ્ટારના મેનેજિંગ ડિરેક્ટરે કહ્યું કે, યુદ્ધના કારણે તમામ કોમોડિટીની કિંમતો વધી રહી છે. કોપર, સ્ટીલ અને પ્લાસ્ટિક બધું મોંઘું થઈ ગયું છે. આ વર્ષે કંપની દ્વારા કરવામાં આવેલો આ ત્રીજો ભાવ વધારો છે. ગયા વર્ષની ફેસ્ટિવ સિઝનથી કિંમતોની સરખામણી કરીએ તો કોસ્ટ 15 ટકા વધી ગઈ છે, પરંતુ હવે ગ્રાહકને લગભગ 10 ટકાનો જીએસટી લાભ મળી રહ્યો છે, જેનાથી ખરીદદારો પર કુલ અસર લગભગ 5 ટકાથી થોડી વધુ હશે.