શેરબજારમાં અઠવાડિયાની શાનદાર શરૂઆત, સેન્સેક્સ-નિફ્ટી આટલા પોઈન્ટ ઉછાળા સાથે બંધ

કારોબારી સપ્તાહના પહેલા દિવસે બજારમાં જોશ અને ઉત્સાહ જોવા મળ્યો . પાવર, ટેલિકોમ અને ફાઇનાન્શિયલ સેક્ટરના શેરમાં ઉછાળાને કારણે સેન્સેક્સ 454 પોઈન્ટ વધીને બંધ થયો અને નિફ્ટી 23,300ની ઉપર બંધ થયો. ભારતીય ઇક્વિટી ઇન્ડેક્સ નિફ્ટી આજે એટલે કે 20 જાન્યુઆરીએ 142 પોઇન્ટ વધીને બંધ થયો હતો.

અમેરિકાના નવા ચૂંટાયેલા રાષ્ટ્રપતિ ડોનાલ્ડ ટ્રમ્પે કહ્યું કે ચીનના રાષ્ટ્રપતિ શી જિનપિંગ સાથે તેમની વાતચીત ‘ખૂબ સારી’ હતી. આ નિવેદનથી બંને દેશો વચ્ચેના વેપારને લઈને તણાવ ઓછો થવાનો સંકેત મળ્યો છે, જે બાદ આજે વૈશ્વિક શેરબજારોમાં સારો ઉછાળો જોવા મળ્યો હતો. અમેરિકન શેરબજારો શુક્રવારે લીલા નિશાનમાં બંધ થયા હતા. તે જ સમયે, હેંગસેંગ અને નિક્કી 225 જેવા એશિયન સૂચકાંકોમાં પણ વૃદ્ધિ જોવા મળી હતી. જિયોજિત ફાઇનાન્શિયલ સર્વિસિસના ચીફ ઇન્વેસ્ટમેન્ટ સ્ટ્રેટેજિસ્ટ વીકે વિજયકુમારે જણાવ્યું હતું કે, “ટેરિફ પર ટ્રમ્પના નરમ વલણથી શેરબજારના સેન્ટિમેન્ટમાં તેજી રહેવાની અપેક્ષા છે.શેરબજારમાં આજના ઉછાળાની આગેવાની બેન્કિંગ શેરોએ કરી હતી. કોટક મહિન્દ્રા બેંકના શેરમાં સૌથી વધુ 9%નો ઉછાળો આવ્યો હતો. કોટક બેંકના ડિસેમ્બર ક્વાર્ટરના મજબૂત પરિણામો બાદ આ વધારો થયો છે. બેંકે કહ્યું કે ડિસેમ્બર ક્વાર્ટરમાં તેનો ચોખ્ખો નફો 10 ટકા વધીને 4701 કરોડ રૂપિયા થયો છે. બીજું, આજે ટ્રેડિંગ દરમિયાન નિફ્ટી બેન્ક ઇન્ડેક્સ 2 ટકા સુધી ઉછળ્યો હતો. ઈન્ડેક્સમાં સમાવિષ્ટ 12માંથી 11 શેરો લીલા નિશાનમાં ટ્રેડ થઈ રહ્યા હતા.