અમદાવાદમાં કાયદો અને વ્યવસ્થાની સ્થિતિ કથળી, કાગડાપીઠમાં યુવકનું અપહરણ કરી હત્યા

અમદાવાદના કાગડાપીઠમાં એક યુવાનની જાહેરમાં કરપીણ હત્યા કરવામાં આવતા સમગ્ર વિસ્તારમાં સનસનાટી મચી ગઈ છે. મળતી માહિતી મુજબ સાતથી આઠ જેટલા ઈસમોએ જૂની અદાવતને કારણે યુવકનું અપહરણ કર્યું હતું અને ત્યારબાદ પાઈપ તથા તીક્ષ્ણ હથિયારો વડે તેને માર મારી હત્યા કરી હતી.

મૃતક યુવકની ઓળખ નીતિન પટણી તરીકે થઈ છે અને તેનું કાગડાપીઠ પાસેથી અપહરણ કરવામાં આવ્યું હોવાનું પણ જાણવા મળ્યું છે. આરોપીઓ દ્વારા કાગડાપીઠ વિસ્તારમાં જાહેરમાં જ તેના પર જીવલેણ હુમલો કરવામાં આવ્યો હતો. પોલીસે આ મામલે હત્યાનો ગુનો નોંધી વધુ તપાસ હાથ ધરી છે અને આરોપીઓને પકડવા માટે ચક્રો ગતિમાન કર્યા છે. આ ઘટનાથી સ્થાનિક લોકોમાં ભારે રોષ અને ભયનો માહોલ જોવા મળી રહ્યો છે. પોલીસ દ્વારા આ મામલે સઘન કાર્યવાહી કરવામાં આવી રહી છે અને ટૂંક સમયમાં જ આરોપીઓની ધરપકડ થાય તેવી શક્યતા છે.

આ હૃદયદ્રાવક ઘટના કાયદો અને વ્યવસ્થાની સ્થિતિ પર ગંભીર સવાલો ઉભા કરે છે.