બોલિવૂડ એક્ટર રણવીર સિંહની મુશ્કેલીઓ વધી છે. થોડા મહિના પહેલા તે ઋષભ શેટ્ટીની ફિલ્મ “કાંતારા: અ લિજેન્ડ – ચેપ્ટર 1” ના દૈવા સીનની નકલ કરતો જોવા મળ્યો હતો. એક જાહેર કાર્યક્રમમાં આવું કરવા બદલ તેને ટીકાનો સામનો કરવો પડ્યો હતો. હવે, અહેવાલો અનુસાર, બુધવારે બેંગલુરુના હાઇ ગ્રાઉન્ડ્સ પોલીસ સ્ટેશનમાં રણવીર સિંહ વિરુદ્ધ FIR દાખલ કરવામાં આવી છે.
રણવીર સિંહ પર હિન્દુ ધાર્મિક લાગણીઓ અને કર્ણાટકના દરિયાકાંઠાના ચાવુંડી દૈવા પરંપરાનું અપમાન કરવાનો આરોપ મૂકવામાં આવ્યો છે. તેની સામે ભારતીય દંડ સંહિતા (IPC) ની કલમ 196, 299 અને 302 હેઠળ કેસ નોંધવામાં આવ્યો છે. બેંગલુરુ સ્થિત વકીલ પ્રશાંત મેથલે આ ફરિયાદ દાખલ કરી હતી.
FIR મુજબ, આ કથિત ઘટના 28 નવેમ્બર, 2025ના રોજ ગોવામાં આયોજિત આંતરરાષ્ટ્રીય ફિલ્મ મહોત્સવ (IFFI) દરમિયાન બની હતી. ફરિયાદીનો આરોપ છે કે રણવીર સિંહે સ્ટેજ પર વાંધાજનક ટિપ્પણીઓ કરી હતી અને દૈવા પરંપરાના પવિત્ર તત્વોની મજાક ઉડાવતા પ્રદર્શન કર્યું હતું.
ફરિયાદમાં જણાવાયું છે કે રણવીરે પંજુરલી અને ગુલિગા દૈવા સાથે સંકળાયેલા હાવભાવની નકલ અને અભિવ્યક્તિઓનું અનુકરણ કર્યું હતું અને તેને અભદ્ર, હાસ્યાસ્પદ અને અપમાનજનક રીતે રજૂ કર્યા હતા. વધુમાં એવો આરોપ છે કે રણવીરે ચાવુંડી દૈવાને “મહિલા ભૂત” તરીકે ઉલ્લેખ કર્યો હતો. ફરિયાદીના જણાવ્યા મુજબ, ચાવુંડી દૈવા કર્ણાટકના દરિયાકાંઠાના પ્રદેશોમાં એક પૂજનીય દેવી માનવામાં આવે છે જે દિવ્ય સ્ત્રી શક્તિનું પ્રતીક છે. તેણીને ભૂત કહેવાથી ધાર્મિક લાગણીઓ દુભાય છે.
આ કેસ હવે બેંગલુરુની પ્રથમ એડિશનલ ચીફ મેટ્રોપોલિટન મેજિસ્ટ્રેટ (CMM) કોર્ટમાં મોકલવામાં આવ્યો છે. 8 એપ્રિલે સુનાવણી થવાની છે. વકીલ પ્રશાંત મેથલે 27 ડિસેમ્બરે ખાનગી ફરિયાદ દાખલ કરી હતી, જેના પગલે કોર્ટે 23 જાન્યુઆરીએ હાઈ ગ્રાઉન્ડ્સ પોલીસ સ્ટેશનને એફઆઈઆર નોંધવાનો આદેશ આપ્યો હતો.
દૈવા સીન વિવાદ પર રણવીર સિંહનો ખુલાસો
વિવાદ વધ્યા પછી રણવીર સિંહે સોશિયલ મીડિયા પર માફી માંગી હતી અને લખ્યું હતું કે, “મારો હેતુ ફક્ત ઋષભના શાનદાર અભિનયની પ્રશંસા કરવાનો હતો. એક અભિનેતા તરીકે હું તે દ્રશ્ય ભજવવા માટે કેટલી મહેનત કરવી પડે છે તે જાણું છું. હું આપણા દેશની દરેક સંસ્કૃતિ, પરંપરા અને આસ્થાનો આદર કરું છું. જો મેં કોઈની લાગણીઓને ઠેસ પહોંચાડી હોય તો હું દિલથી માફી માંગુ છું.”