IPL માં હની ટ્રેપ, ખેલાડીઓ અને સપોર્ટ સ્ટાફની સુરક્ષાને લઈને BCCI એ કડક નિયમો લાગુ કર્યા છે. બોર્ડે આ જોખમોથી બચાવવા માટે ખેલાડીઓના હોટેલ રૂમ, બસ અને ડગઆઉટમાં પરવાનગી વગર બહારના લોકોના પ્રવેશ પર પ્રતિબંધ મૂક્યો છે. ફ્રેન્ચાઇઝી માલિકો પર પણ દેખરેખ વધારી દેવામાં આવી છે.
BCCI ની એન્ટી કરપ્શન એન્ડ સિક્યુરિટી યુનિટ (ACSU) ના રિપોર્ટ અનુસાર, ઘણી મેચો દરમિયાન ટીમના ડગઆઉટ, હોટેલ અને ટીમ બસમાં એવા લોકો જોવા મળ્યા હતા, જેમને ત્યાં રહેવાની પરવાનગી ન હતી. આ પ્રોટોકોલ ઉલ્લંઘનનો મામલો છે.
મહેમાનોને મેનેજરની લેખિત મંજૂરી જરૂરી રહેશે
BCCI સચિવ દેવજીત સૈકિયાએ તમામ ફ્રેન્ચાઇઝીઓને મોકલેલા નિર્દેશમાં જણાવ્યું હતું કે હવે કોઈપણ ખેલાડી કે સ્ટાફના રૂમમાં કોઈ મહેમાન ટીમ મેનેજરની લેખિત મંજૂરી પછી જ પ્રવેશ કરી શકશે.
ખેલાડીઓ અને સ્ટાફને અનિયમિત સમયે હોટલમાંથી બહાર જવાથી પણ રોકવામાં આવ્યા છે. જો બહાર જવું જરૂરી હોય, તો સિક્યોરિટી લાયઝન ઓફિસર અને ટીમ ઇન્ટિગ્રિટી ઓફિસરને અગાઉથી જાણ કરવી પડશે.BCCIએ એમ પણ કહ્યું છે કે મેચ દરમિયાન ફ્રેન્ચાઇઝી માલિકો, ખેલાડીઓ કે ટીમ સ્ટાફ સાથે સીધો સંપર્ક કરી શકશે નહીં. ડ્રેસિંગ રૂમ, ડગઆઉટ કે મેદાનમાં જઈને વાતચીત કરવી પણ નિયમો વિરુદ્ધ હશે.
વેપિંગ અને ઈ-સિગારેટ પર સંપૂર્ણ પ્રતિબંધ
IPL 2026 માં વેપિંગના કિસ્સાઓ પણ સામે આવ્યા છે. આ મામલે રાજસ્થાન રોયલ્સના કેપ્ટન રિયાન પરાગ પર દંડ પણ ફટકારવામાં આવ્યો હતો. પંજાબ કિંગ્સના યુઝવેન્દ્ર ચહલનો એક વીડિયો પણ વાયરલ થયો હતો. ચહલે તેની પુષ્ટિ કે ખંડન કર્યું નથી.
બોર્ડે આ બધા પછી IPL સંબંધિત તમામ સ્થળો જેમ કે ડ્રેસિંગ રૂમ, હોટેલ અને પ્રેક્ટિસ એરિયામાં વેપિંગ અને ઈ-સિગારેટના ઉપયોગ પર પણ કડક પ્રતિબંધ મૂક્યો છે. જણાવી દઈએ કે વેપિંગ અને ઈ-સિગારેટ ભારતીય કાયદા હેઠળ પહેલેથી જ પ્રતિબંધિત છે.
દંડ અથવા સસ્પેન્શન શક્ય
BCCI એ ફ્રેન્ચાઇઝી અને ખેલાડીઓને ચેતવણી આપી છે કે આ નિયમોનું ઉલ્લંઘન કરવા પર દંડ, સસ્પેન્શન અથવા ડિસ્ક્વોલિફિકેશનની કાર્યવાહી થઈ શકે છે.
PMOA પ્રોટોકોલ શું છે?
- IPL માં ફિક્સિંગ અને ભ્રષ્ટાચાર રોકવા માટે ‘પ્લેયર્સ એન્ડ મેચ ઓફિશિયલ્સ એરિયા’ (PMOA) બનાવવામાં આવે છે. તેમાં ડ્રેસિંગ રૂમ, ડગઆઉટ અને મેચ સંબંધિત ખાસ વિસ્તારોનો સમાવેશ થાય છે.
- અહીં ફક્ત ખેલાડીઓ, કોચ, સપોર્ટ સ્ટાફ અને અધિકૃત મેચ અધિકારીઓને જ પ્રવેશ મળે છે.
- આ વિસ્તારમાં મોબાઇલ ફોન અને કોઈપણ કોમ્યુનિકેશન ડિવાઇસનો ઉપયોગ પ્રતિબંધિત છે.
- ટીમ માલિકો પણ ટોસ પછી ડગઆઉટ કે ડ્રેસિંગ રૂમમાં જઈ શકતા નથી.