‘જાટ સમુદાયને OBCમાં સામેલ કરો’, કેજરીવાલે PM મોદીને લખ્યો પત્ર
દિલ્હી વિધાનસભા ચૂંટણીનું બ્યુગલ વાગી ગયું છે. હવે આમ આદમી પાર્ટીના પ્રમુખ અરવિંદ કેજરીવાલે એક મોટું પગલું ભર્યું છે. કેજરીવાલે વડાપ્રધાન નરેન્દ્ર મોદીને પત્ર લખીને કેન્દ્ર સરકારને જાટ સમુદાયને OBC યાદીમાં સામેલ કરવા વિનંતી કરી છે. જેથી શિક્ષણ અને નોકરીઓમાં રિઝર્વેશનની સુવિધા આપી શકાય.દિલ્હીના પૂર્વ મુખ્યમંત્રીએ કેન્દ્ર પર છેલ્લા 10 વર્ષથી જાટો સાથે વિશ્વાસઘાત કરવાનો આરોપ પણ લગાવ્યો હતો.
કેજરીવાલની પત્રકાર પરિષદ
અરવિંદ કેજરીવાલે આજે પ્રેસ કોન્ફરન્સ કરતા કહ્યું કે, ‘દિલ્હીના જાટ સમુદાયને છેલ્લા 10 વર્ષથી વડાપ્રધાન મોદી, ગૃહમંત્રી અમિત શાહ અને ભાજપ દ્વારા દગો આપવામાં આવ્યો છે. દિલ્હીના જાટ સમુદાયને કેન્દ્ર સરકારની કોઈપણ કોલેજ, યુનિવર્સિટી કે ઈન્સ્ટિટ્યૂટમાં અનામત નથી મળતી. વડાપ્રધાન અને ગૃહમંત્રીને ચૂંટણી પહેલા જ દિલ્હીના જાટો યાદ આવે છે.’
ભાજપે જાટ સમુદાયને OBCમાં સામેલ કરવાનું આપ્યું હતું વચન- કેજરીવાલે
AAPના વડાએ પોતાના પત્રમાં કહ્યું,’જાટ સમુદાયના પ્રતિનિધિઓએ મને જણાવ્યું કે 26 માર્ચ, 2015ના રોજ તમે દિલ્હીના જાટ સમુદાયના પ્રતિનિધિઓને ઘરે બોલાવ્યા હતા અને વચન આપ્યું હતું કે જાટ સમુદાય જે ઓબીસી સૂચિમાં છે તેને કેન્દ્રની ઓબીસી લિસ્ટમાં પણ જોડવામાં આવશે જેથી તેમને દિલ્હીમાં કેન્દ્ર સરકારની કોલેજો અને નોકરીમાં અનામતનો લાભ મળી શકે.’
અરવિંદ કેજરીવાલે પત્રમાં કહ્યું કે, ‘8 ફેબ્રુઆરી 2017ના રોજ કેન્દ્રીય ગૃહ મંત્રી અમિત શાહે યુપી ચૂંટણી પહેલા ચૌધરી બિરેન્દ્ર સિંહના ઘરે દિલ્હી અને દેશના જાટ નેતાઓની બેઠક બોલાવી અને તેમને વચન આપ્યું કે જે ઓબીસી જાતિઓ છે તેમને કેન્દ્રની યાદીમાં ઉમેરવામાં આવશે. 2019 લોકસભા ચૂંટણી પહેલા દિલ્હીમાં ફરી ભાજપ સાંસદ પ્રવેશ વર્માના ઘરે અમિત શાહ જાટ નેતાઓને મળ્યા હતા અને તેમણે ફરીથી વચન આપ્યું હતું કે દિલ્હીના જાટ સમુદાયને કેન્દ્રની OBC યાદીમાં સામેલ કરવામાં આવશે, પરંતુ તેના પર કોઈ કામ થયું નથી.’કેજરીવાલે પોતાના પત્રમાં કહ્યું કે, ‘મને ખબર પડી કે કેન્દ્રની OBC યાદીમાં હોવાને કારણે રાજસ્થાનથી આવતા જાટ સમુદાયના યુવાનોને દિલ્હી યુનિવર્સિટીમાં OBC અનામતનો લાભ મળે છે પરંતુ બીજી તરફ દિલ્હીના જાટ સમુદાયને જ દિલ્હી યુનિવર્સિટીમાં OBC અનામતનો લાભ મળતો નથી કારણ કે દિલ્હીમાં OBC અનામત હોવા છતાં તમારી સરકારે જાટ સમુદાયને કેન્દ્રીય OBC યાદીમાં સામેલ કર્યો નથી.