ભાજપ ઉમેદવારના ભાણાની છરીના ઘા ઝીંકીને હત્યા કરાઇ, કારણ જાણીને ચોંકી જશો

મહેસાણામાં સ્થાનિક સ્વરાજ્યની ચૂંટણીનો માહોલ ગરમાયો છે. પરંતુ આ વચ્ચે એક દુખદ અને ચોંકાવનારી ઘટના સામે આવી છે. રાજકીય વિવાદે હિંસક સ્વરૂપ ધારણ કરતા એક યુવાનનું મૃત્યુ થયું છે. જેના કારણે સમગ્ર વિસ્તારમાં તણાવનો માહોલ સર્જાયો છે.

આ મામલે મળતી માહિતી મુજબ મહેસાણા શહેરના તાવડિયા રોડ વિસ્તારમાં ભાજપ અને કોંગ્રેસના સમર્થકો વચ્ચે અથડામણ થઈ હતી. આ દરમિયાન ભાજપના ઉમેદવારના ભાણા મિતેન ચૌધરી પર 4થી 5 અજાણ્યા શખ્સોએ હુમલો કર્યો હતો. હુમલાખોરોએ છરી, લાકડીઓ અને પાઈપ જેવા હથિયારોનો ઉપયોગ કરીને મિતેન પર જીવલેણ હુમલો કર્યો. ગંભીર રીતે ઇજાગ્રસ્ત થયેલા મિતેનને તાત્કાલિક સારવાર માટે ખસેડવામાં તો આવ્યો પણ સારવાર દરમિયાન તેનું મોત થયું હતું. આ ઘટનામાં મિતેનનો મિત્ર ધીમંત ચૌધરી પણ ઘાયલ થયો છે. જ્યારે સામે પક્ષના કોંગ્રેસ ઉમેદવારના પતિ ભરત ચૌધરીને પણ ઇજાઓ પહોંચતા હોસ્પિટલમાં સારવાર માટે ખસેડવામાં આવ્યા છે.

DySP મિલાપ પટેલના જણાવ્યા મુજબ આ ઘટના મોડી રાત્રે બની હતી. મિતેન ચૌધરી અને તેના મિત્રો કારમાં તાવડિયા તરફ જઈ રહ્યા હતા ત્યારે રસ્તામાં તેમની ગાડી રોકીને 4થી 5 શખ્સોએ હુમલો કર્યો હતો. હુમલાખોરોએ તીક્ષ્ણ હથિયારો અને લાકડી-પાઈપ વડે હુમલો કરતા મિતેનને ગંભીર ઇજાઓ થઈ હતી. હાલ પોલીસ દ્વારા સમગ્ર મામલે ગુનો નોંધવાની કાર્યવાહી હાથ ધરાઈ છે. CCTV ફૂટેજ અને CDRના આધારે આરોપીઓની ઓળખ કરવા અને તેમને ઝડપવા માટે તપાસ તેજ બનાવાઈ છે. કોણ કોણ આરોપીઓ છે અને આ હુમલા પાછળ શું કાવતરું હતું તે અંગે પણ પોલીસ દ્વારા વિગતવાર તપાસ ચાલી રહી છે.