ગુજરાતમાં કડી અને વિસાવદર વિધાનસભા બેઠક પર પરિણામ જાહેર થઇ ગયું છે. કડી બેઠક પર ભાજપ જ્યારે વિસાવદર બેઠક પર આમ આદમી પાર્ટીનો વિજય થયો છે. 182 બેઠક ધરાવતી ગુજરાત વિધાનસભામાં ભાજપનું સંખ્યાબળ એક બેઠક વધીને 162 થયું છે જ્યારે આમ આદમી પાર્ટીની એક બેઠક વધતા સંખ્યાબળ 5 થયું છે. કોંગ્રેસને વિધાનસભા પેટા ચૂંટણીમાં એક પણ બેઠક મળી નથી.
અનુસૂચિત જાતિ અનામત કડી વિધાનસભા બેઠક કરસનભાઇ સોલંકીના નિધનથી ખાલી પડી હતી જ્યારે વિસાવદર બેઠકથી ચૂંટાયેલા આમ આદમી પાર્ટીના ધારાસભ્ય ભૂપત ભાયાણીએ રાજીનામુ આપતા ખાલી પડી હતી. આ બન્ને બેઠકો જીતીને ભાજપ-AAPએ પોતાની બેઠક જાળવી રાખી છે. કડી બેઠક પર ભાજપના રાજેન્દ્ર ચાવડાનો વિજય થયો છે જ્યારે વિસાવદર બેઠક પર આમ આદમી પાર્ટીના ગોપાલ ઇટાલિયાનો વિજય થયો છે. ગોપાલ ઇટાલિયા પ્રથમ વખત વિધાનસભામાં પહોંચશે.
ગુજરાત વિધાનસભામાં 182 બેઠક છે જેમાં સૌથી વધુ ભાજપના 162 ધારાસભ્ય થઇ ગયા છે. કોંગ્રેસના 12 ધારાસભ્ય છે જ્યારે આમ આદમી પાર્ટીના 5 ધારાસભ્ય છે. બે અપક્ષ ધારાસભ્ય છે જેમનું NDAને સમર્થન છે. એક સમાજવાદી પાર્ટીના ધારાસભ્ય છે.
ગુજરાત વિધાનસભા ચૂંટણીમાં ગોપાલ ઇટાલિયાની વિસાવદર બેઠક પર જીતની સાથે જ આમ આદમી પાર્ટીના 5 ધારાસભ્ય થઇ ગયા છે. આ પહેલા AAPના જામ જોધપુરના ધારાસભ્ય હેમંત ખાવા,વિસાવદરના ગોપાલ ઇટાલિયા, ગારિયાધારના સુધીર વાઘાણી, બોટાદના ઉમેશ મકવાણા અને ડેડિયાપાડાના ચૈતર વસાવા ધારાસભ્ય છે.