મારા ખભા પર મારો તિરંગો, જય હિંદ, જય ભારત’, સ્પેસમાંથી શુભાંશુ શુક્લાનો પ્રથમ મેસેજ
ભારતના શુભાંશુ શુક્લાએ કેનેડી સ્પેસ સેન્ટરથી એક્સિઓમ-4 મિશન માટે ત્રણ અન્ય અવકાશયાત્રીઓ સાથે ઉડાન ભરી છે. આ મિશનનું સંચાલન ભારતના શુભાંશુ શુક્લા કરી રહ્યા છે. તેમણે અવકાશમાં પહોંચતાની સાથે જ દેશ માટે પહેલો સંદેશ મોકલ્યો હતો. શુભાંશુએ કહ્યું કે મારા ખભા પર મારો ત્રિરંગો છે. આખો દેશ મારી સાથે છે. અવકાશ મિશન પર જતા પહેલા તેમણે બધાનો આભાર માન્યો હતો.
અમેરિકાના ફ્લોરિડા સ્થિત નાસાના કેનેડી સ્પેસ સેન્ટરથી શરૂ થયેલા મિશનમાં ક્રૂ કંપનીના ફાલ્કન 9 રોકેટનો ઉપયોગ કરવામાં આવી રહ્યો છે. બધા અવકાશયાત્રીઓ નવા સ્પેસએક્સ ડ્રેગન અવકાશયાનમાં સવાર છે. અવકાશમાં પહોંચ્યા પછી શુભાંશુએ દેશ માટે પહેલો સંદેશ મોકલ્યો હતો.
ભારતીય અવકાશયાત્રી શુભાંશુ શુક્લાએ કહ્યું હતું કે, “નમસ્કાર, મારા પ્રિય દેશવાસીઓ! આપણે 41 વર્ષ પછી ફરી અવકાશમાં પહોંચ્યા છીએ. આ એક અદભૂત યાત્રા છે. આપણે પૃથ્વીની પરિક્રમા 7.5 કિલોમીટર પ્રતિ સેકન્ડની ઝડપે કરી રહ્યા છીએ. મારા ખભા પરનો મારો ત્રિરંગો મને કહે છે કે હું તમારી બધાની સાથે છું. મારી આ યાત્રા આંતરરાષ્ટ્રીય અવકાશ મથક (ISS) ની શરૂઆત નથી, આ ભારતના માનવ અવકાશ કાર્યક્રમની શરૂઆત છે. હું ઇચ્છું છું કે તમે બધા આ યાત્રાનો ભાગ બનો. તમારી છાતી પણ ગર્વથી ફૂલી જાય. ચાલો આપણે બધા સાથે મળીને ભારતના માનવ અવકાશ કાર્યક્રમની શરૂઆત કરીએ. જય હિંદ! જય ભારત!”
એક્સિઓમ-4 મિશન પર ગયેલા અવકાશયાત્રી શુભાંશુ શુક્લાના પરિવારમાં ખુશીનો માહોલ છે. પરિવારે કહ્યું હતું કે તેઓ તેમના પુત્રની સિદ્ધિ પર ગર્વ અનુભવે છે. શુભાંશુના સમગ્ર પરિવારે ખુશી વ્યક્ત કરી છે. પરિવારે કહ્યું કે તેમના કારણે આજે અમારી છાતી ગર્વથી ફૂલી ગઈ છે.
આ અવકાશ મિશન માટે પરિવહન પૂરું પાડી રહેલા સ્પેસએક્સે સોશિયલ મીડિયા પ્લેટફોર્મ X પર એક પોસ્ટમાં જણાવ્યું હતું કે, “બુધવારે અવકાશ મથક પર Axiom_Space ના Ax-4 મિશનના લોન્ચ માટે બધી સિસ્ટમો સારી દેખાઈ રહી છે અને હવામાન ઉડાન માટે 90 ટકા અનુકૂળ દેખાઈ રહ્યું છે.”
આ પણ વાંચો, http://‘આગામી 24 કલાકમાં જ…’, સુરત-વડોદરા-અમદાવાદ સહિતના જિલ્લાઓ રહે એલર્ટ, પરેશ ગોસ્વામીની ડેન્જર આગાહી