ભારતના રાજકારણમાં મોટી ઉથલપાથલના સંકેત! અંબાલાલ પટેલની ચોંકાવનારી આગાહી

 હવામાન નિષ્ણાત અને આગાહીકાર અંબાલાલ પટેલે આગામી સમયને લઈને ચોંકાવનારી આગાહી કરી છે. જ્યોતિષ શાસ્ત્રો અને નાડીગ્રંથોના આધારે આગામી સમય મુશ્કેલ હોય તેવું જણાઈ રહ્યું છે. તેમની આગાહી મુજબ, વિશ્વમાં નકારાત્મક ઊર્જાઓ આકાર લઈ રહી છે અને આગામી સમયમાં અનેક દેશોમાં રાજકીય વાતાવરણ કથળી શકે છે. દેશના અગ્રગણ્ય લોકોએ પણ સાવચેતી રાખવા જેવી સ્થિતિ ઊભી થઈ શકે છે.

આગાહી મુજબ, અરબ રાષ્ટ્રો, ઈરાક, પાકિસ્તાન, લીબિયા અને સીરિયા સહિતના દેશોમાં રાજકીય વાતાવરણ બગડવાની શક્યતા છે. મુસ્લિમ રાષ્ટ્રોમાં આંતરિક કલહ વધી શકે છે. ખાસ કરીને પાકિસ્તાન અને બાંગ્લાદેશમાં આંતરિક કલહ વધવાની શક્યતા વ્યક્ત કરવામાં આવી છે.

પાકિસ્તાન, બાંગ્લાદેશ, ઈજિપ્ત, અમેરિકા, યુકે, વેલ્સ, સ્વિત્ઝર્લેન્ડ, ફ્રાન્સ, ઓસ્ટ્રેલિયા, અરબ દેશો, બ્રાઝીલ અને જાપાન સહિતના દેશોમાં કુદરતી કહેરની શક્યતા રહેશે. આ ઉપરાંત, રશિયા માટે પણ સમય અનુકૂળ ન હોવાનું જણાવવામાં આવ્યું છે. રશિયામાં રોગચાળાથી સાવચેત રહેવાની જરૂરિયાત દર્શાવવામાં આવી છે.

ભારતના રાજકારણમાં આંતરિક કલહ વધી શકે છે

દેશના રાજકારણ અંગે પણ અંબાલાલ પટેલે મોટી આગાહી કરી છે, તેમના જણાવ્યા મુજબ, દેશના અગ્રગણ્ય વ્યક્તિઓએ કાવતરાંથી સાવચેત રહેવું જોઈએ. દેશમાં રાજકારણમાં આંતરિક કલહ વધી શકે છે અને આંદોલનોની જ્યોત જોવા મળી શકે છે. રાજનેતાઓ, ઉદ્યોગપતિઓ અને ફિલ્મોના પ્રોડ્યુસરો માટે આગામી સમય આપત્તિસૂચક અને અનિષ્ટ જેવો જણાઈ રહ્યો છે. ઉપરોક્ત વ્યક્તિઓએ પોતાના આરોગ્યનું પણ ધ્યાન રાખવું જોઈએ.

હવામાન અંગે પણ કરી આગાહી

હવામાનની આગાહી કરતાં તેમણે જણાવ્યું છે કે, ભારતમાં ઉત્તર પ્રદેશ, બંગાળ, ઓરિસ્સા, આંધ્ર પ્રદેશ, ગુજરાત, રાજસ્થાન, હરિયાણા અને પંજાબમાં હવામાન કથળી શકે છે. આ વિસ્તારોમાં હવામાનની સ્થિતિ પ્રતિકૂળ રહેવાની શક્યતા વ્યક્ત કરવામાં આવી છે.

આ ઉપરાંત, ઉત્તરીય પર્વતીય વિસ્તારોમાં બરફનું ભૂસ્ખલન અને હિમવર્ષા થઈ શકે છે. અંબાલાલ પટેલની આગાહી મુજબ, આગામી સમયમાં વિશ્વના અનેક દેશોમાં રાજકીય અસ્થિરતા, આંતરિક કલહ, કુદરતી આપત્તિઓ અને આરોગ્ય સંબંધિત પડકારોની શક્યતાઓ દર્શાવવામાં આવી છે.