શેરબજારમાં મોટો કડાકો, સેન્સેક્સ 740 પોઈન્ટ તૂટ્યો

 ભારતીય શેરબજારમાં આજે 12 ઓક્ટોબરે ઘટાડા સાથે કારોબાર થઈ રહ્યો છે. સવારે 7 વાગ્યે ગિફ્ટ નિફ્ટી 18 અંક વધીને 22,628 ના સ્તર પર કારોબાર કરતો જોવા મળ્યો. જોકે, દક્ષિણ કોરિયાના કોસ્પી અને તાઈવાનના બજારોમાં ઘટાડો જોવા મળ્યો. જાપાનનું નિક્કેઈ બજાર આજે બંધ છે. આ પહેલા યુએસ માર્કેટ પણ લીલા નિશાનમાં બંધ થયા હતા. આ દરમિયાન, બ્રિન્ટ ક્રૂડનો ભાવ 103 ડોલર પ્રતિ બેરલ પર બનેલો છે, જ્યારે અમેરિકી ડોલર ઈન્ડેક્સ 102 ના સ્તર પર કારોબાર કરી રહ્યો છે. રોકાણકારોની નજર કાચા તેલની કિંમતો અને ગ્લોબલ બજારોના વલણ પર રહેશે.

ભારતીય શેરબજારમાં આજે, 12 ઓક્ટોબરના રોજ ભારે વેચવાલી જોવા મળી રહી છે. સવારના ઉછાળાને ગુમાવ્યા બાદ બેન્ચમાર્ક ઇન્ડેક્સ સેન્સેક્સ અને નિફ્ટી દિવસની ઊંચી સપાટીથી મોટો ઘટાડો નોંધાવીને લાલ નિશાનમાં આવી ગયા છે. બપોરે 3 વાગ્યા સુધીના આંકડા અનુસાર, સેન્સેક્સ 767.65 પોઇન્ટ (1.05%)ના મોટા ઘટાડા સાથે 71,704.68ના સ્તરે કારોબાર કરી રહ્યો હતો, જ્યારે નિફ્ટી 50 ઇન્ડેક્સ 200.45 પોઇન્ટ (0.89%) ઘટીને 22,320.00ના સ્તરે આવી ગયો હતો.

આ ઉપરાંત નિફ્ટી બેન્કમાં 519 પોઇન્ટ (0.94%) અને નિફ્ટી ITમાં 344 પોઇન્ટ (1.20%)નો મોટો ઘટાડો નોંધાયો હતો. જોકે, બ્રોડર માર્કેટમાં સ્મોલ-કેપ સૂચકાંકોએ મુખ્ય સૂચકાંકોની સરખામણીએ સારું પ્રદર્શન કર્યું હતું અને તેમાં 1 ટકાથી વધુનો ઉછાળો જોવા મળ્યો હતો.

સળંગ બે સત્રની તેજી બાદ ઊંચા સ્તરે રોકાણકારોએ મોટા પાયે નફારૂપી વેચવાલી કરી હતી. અગાઉના સત્રમાં નિફ્ટી 22,520ના સ્તરે બંધ રહ્યો હતો. આજે સેન્સેક્સ દિવસની તેની ઊંચી સપાટીથી આશરે 1,100 પોઇન્ટ નીચે ગગડી ગયો હતો, જેના કારણે નિફ્ટી 22,350ના મહત્ત્વપૂર્ણ મનોવૈજ્ઞાનિક સ્તરથી પણ નીચે સરકી ગયો હતો.

અમેરિકા અને ઈરાન વચ્ચે વધતા તણાવને કારણે, ‘ડોલર ઈન્ડેક્સ’ 102.5 ની સપાટીની નજીક કારોબાર કરી રહ્યો છે, જે છેલ્લા 18 મહિનાની ઊંચી સપાટી છે. ડોલરની મજબૂતીને લીધે રોકાણકારો ભારત જેવા ઉભરતા બજારોમાંથી નાણાં પાછા ખેંચીને અમેરિકન સંપત્તિઓમાં રોકાણ કરી રહ્યા છે, જેનાથી રૂપિયો અને શેરબજાર બંને પર નકારાત્મક અસર પડી રહી છે.

સેક્ટર-વાર વાત કરીએ તો, ‘નિફ્ટી PSU બેંક’ ઇન્ડેક્સ પર સૌથી વધુ દબાણ જોવા મળ્યું હતું, જેમાં SBI, PNB અને કેનરા બેંકના શેરમાં 1% થી 2%નો ઘટાડો નોંધાયો હતો. આ ઉપરાંત, ભારતી એરટેલ, ઇન્ડસ ટાવર્સ અને NTPC જેવા મુખ્ય શેરોમાં આવેલા ઘટાડાને કારણે ‘નિફ્ટી ઇન્ફ્રાસ્ટ્રક્ચર ઇન્ડેક્સ’ નીચે આવ્યો હતો. ફાર્મા સેક્ટરમાં, ડૉ. રેડ્ડીઝ અને સિપ્લામાં નજીવો વધારો જોવા મળ્યો હોવા છતાં, અન્ય મુખ્ય ફાર્મા શેરો ઘટાડા સાથે કારોબાર કરી રહ્યા હતા.