યુક્રેનમાં MV ગોલ્ડન લીઓ જહાજ પર મિસાઈલ હુમલામાં 4 ભારતીયોના મોત, MEA એ કરી નિંદા

રશિયા અને યુક્રેન વચ્ચે ચાલી રહેલા યુદ્ધની ભયાનક અસરો હવે નિર્દોષ ભારતીયો પર પણ પડી રહી છે. યુક્રેનના ઓડેસા બંદરથી રવાના થઈ રહેલા એક વાણિજ્યિક જહાજ ‘એમવી ગોલ્ડન લીઓ’ (MV Golden Leo) પર ભયાનક મિસાઈલ હુમલો થયો છે. આ ગોઝારી ઘટનામાં જહાજ પર સવાર 4 ભારતીય ક્રૂ મેમ્બર્સના કમનસીબ મોત થયા છે, જ્યારે અન્ય એક ભારતીયની હાલત અત્યંત ગંભીર છે. આ જહાજ પર કુલ 17 ક્રૂ મેમ્બર્સ સવાર હતા, જેમાં 5 ભારતીયોનો સમાવેશ થતો હતો. આ ઘટના બાદ ભારત સરકારના વિદેશ મંત્રાલયે (MEA) કડક પ્રતિક્રિયા આપતા નિર્દોષ નાગરિકો અને કોમર્શિયલ શિપિંગને નિશાન બનાવવાના આ કૃત્યની આકરી નિંદા કરી છે.

વિદેશ મંત્રાલયે આ ઘટના અંગે સત્તાવાર નિવેદન આપતા જણાવ્યું હતું કે, “19 જુલાઈ, 2026 ની સાંજે જ્યારે એમવી ગોલ્ડન લીઓ જહાજ ઓડેસા બંદરથી રવાના થઈ રહ્યું હતું, ત્યારે તેના પર હુમલો કરવામાં આવ્યો હતો. તેમાં 5 ભારતીય નાગરિકો પણ હતા. અત્યંત દુઃખ સાથે જણાવવું પડે છે કે આ હુમલામાં 4 ભારતીય નાગરિકોએ જીવ ગુમાવ્યા છે, જ્યારે એક વ્યક્તિ ગંભીર હાલતમાં હોસ્પિટલમાં સારવાર હેઠળ છે.” મંત્રાલયે વધુમાં ઉમેર્યું કે ભારત સરકાર યુક્રેનની સ્થિતિ પર સતત નજર રાખી રહી છે અને પીડિતોને તમામ શક્ય મદદ પહોંચાડવાના પ્રયાસો ચાલુ છે. સરકારે મૃતકોના પરિવારો પ્રત્યે ઊંડી સંવેદના વ્યક્ત કરી છે અને ઘાયલ ભારતીય નાગરિક ઝડપથી સંપૂર્ણ સ્વસ્થ થાય તેવી પ્રાર્થના કરી છે.

આ સાથે જ વિદેશ મંત્રાલયે સ્પષ્ટ શબ્દોમાં કહ્યું છે કે, “ભારત આવા હુમલાઓની સખત નિંદા કરે છે. વાણિજ્યિક શિપિંગને નિશાન બનાવવું, નિર્દોષ લોકોના જીવ જોખમમાં મૂકવા અથવા તો મુક્ત વેપાર અને નેવિગેશનમાં અડચણ ઊભી કરવી એ અત્યંત નિંદનીય છે અને આવું ભવિષ્યમાં ન થવું જોઈએ.”

આ હુમલા અંગે યુક્રેનિયન નૌકાદળે વિગતવાર માહિતી આપતા જણાવ્યું હતું કે, રશિયાએ ગિની-બિસાઉ (Guinea-Bissau) દેશનો ધ્વજ ધરાવતા આ જહાજ ‘ગોલ્ડન લીઓ’ પર એકસાથે 3 ક્રૂઝ મિસાઈલો ઝીંકી હતી. આ જહાજમાં મકાઈનો જથ્થો ભરેલો હતો અને તેમાં ભારતીય તેમજ સીરિયન ક્રૂ સવાર હતા. મિસાઈલ હુમલાના કારણે જહાજમાં ભીષણ આગ ફાટી નીકળી હતી. યુક્રેનની પોર્ટ ઓથોરિટીના જણાવ્યા અનુસાર, આખી રાત બચાવ કામગીરી ચાલુ રહી હતી. આ ભયાનક હુમલામાં કુલ 9 ક્રૂ મેમ્બર્સ અને 1 પાઈલટનું મોત નીપજ્યું છે.