અમેરિકા-ઈરાન યુદ્ધ સમાપ્ત થતા ઝૂમી ઉઠ્યું શેરબજાર, સેન્સેક્સમાં 1197 પોઈન્ટનો ઉછાળો

 ભારતીય શેરબજારમાં આજે ઐતિહાસિક ઉછાળો જોવા મળી રહ્યો છે, જે રેકોર્ડ સ્તરે ટ્રેડ થઈ રહ્યો છે. અમેરિકા અને ઈરાન વચ્ચેના યુદ્ધને સમાપ્ત કરવા માટે શાંતિ કરારની મોટી જાહેરાત બાદ બજારમાં ભારે ખરીદી જોવા મળી રહી છે. સેન્સેક્સ 1197 પોઈન્ટ ઉછળીને 76,925.27 પર ખુલ્યો, જ્યારે NSE નિફ્ટી પણ આશરે 362 પોઈન્ટના જંગી વધારા સાથે 23,984.85 પર ખુલ્યો હતો. 

પાકિસ્તાનના વડા પ્રધાન શાહબાઝ શરીફે જાહેરાત કરી છે કે અમેરિકા અને ઈરાન યુદ્ધનો અંત લાવવા સંમત થયા છે અને બંને પક્ષોએ તમામ મોરચે લશ્કરી કાર્યવાહી પર તાત્કાલિક અને હંમેશા માટે  રોક લગાવવાની જાહેરાત કરી છે. તેમણે કહ્યું કે કરાર પર સત્તાવાર રીતે 19 જૂન, શુક્રવારના રોજ સ્વિટ્ઝર્લૅન્ડમાં હસ્તાક્ષર કરવામાં આવશે. દરમિયાન, અમેરિકન રાષ્ટ્રપતિ ડોનાલ્ડ ટ્રમ્પે પણ કહ્યું, “દુનિયાના જહાજો, તમારા એન્જિન શરૂ કરો.” 

અમેરિકા અને ઈરાન વચ્ચે ચાર મહિનાથી ચાલી રહેલા સંઘર્ષનો અંત લાવવા માટે પ્રારંભિક સોદો થયો છે અને તેની અસર આજે એશિયન બજારો પર જોવા મળી રહી છે. સોમવારે એશિયન બજારો ઊંચા સ્તરે ખુલ્યા. કોસ્પી 7.01% વધ્યો, જ્યારે સ્મોલ-કેપ કોસ્ડેક 3.25% વધ્યો. તેવી જ રીતે જાપાનનો નિક્કી 225 3.4% વધ્યો અને ટોપિક્સ 1.8% વધ્યો. હોંગકોંગનો હેંગ સેંગ ઇન્ડેક્સ ફ્યુચર્સ 24,376 પર હતો, જે ઇન્ડેક્સના અગાઉના બંધ 24,249.29 કરતા વધારે હતો.

યુએસ શેરબજાર

અમેરિકા અને ઈરાન વચ્ચે શાંતિ કરારની સત્તાવાર જાહેરાતથી વોલ સ્ટ્રીટ પણ તેજી જોવા મળી હતી.  ટ્રમ્પે રવિવારે મોડી રાત્રે કહ્યું કે યુએસ અને ઈરાન યુદ્ધનો અંત લાવવા માટે કરાર પર પહોંચી ગયા છે, ત્યારબાદ સોમવારે યુએસ બેન્ચમાર્ક ફ્યુચર્સ વધ્યા. ડાઉ જોન્સ ઇન્ડસ્ટ્રિયલ એવરેજ સાથે જોડાયેલા ફ્યુચર્સ 342 પોઈન્ટ અથવા 0.7% વધ્યા. S&P 500 ફ્યુચર્સ 0.9% વધ્યા, જ્યારે Nasdaq 100 ફ્યુચર્સ 1.4% વધ્યા.

ક્રૂડ ઓઇલના ભાવમાં ઘટાડો

વેસ્ટ ટેક્સાસ ઇન્ટરમીડિયેટ (WTI) ક્રૂડ ફ્યુચર્સ 4.45% ના ભારે ઘટાડા સાથે $81.10 પ્રતિ બેરલ પર ટ્રેડ કરી રહ્યા હતા. દરમિયાન ઓગસ્ટ ડિલિવરી માટે બ્રેન્ટ ક્રૂડ ફ્યુચર્સ આજે સવારે $84.08 પર ટ્રેડ કરી રહ્યા હતા, જે 3.5% ઘટીને $85 ના મહત્વપૂર્ણ મનોવૈજ્ઞાનિક સ્તરથી નીચે હતા. COMEX ક્રૂડના ભાવ 4.47% વધીને $81.09 પ્રતિ બેરલ પર ટ્રેડ કરી રહ્યા હતા.