બાળકોની BCG, ઓરીની રસી અને કેન્સરની દવાઓના ભાવમાં મોટો વધારો
નાના બાળકોના વાલીઓ માટે એક અગત્યના સમાચાર છે. હવે બાળકોને ગંભીર બીમારીઓથી બચાવવા માટે અપાતી રસીઓ થોડી મોંઘી થવા જઈ રહી છે. નેશનલ ફાર્માસ્યુટિકલ પ્રાઇસિંગ ઓથોરિટી (NPPA) એ પોતાની 147મી બેઠકમાં બાળકો માટે ખૂબ જ જરૂરી એવી BCG, ઓરી અને MR (ઓરી-રુબેલા) રસીના ભાવ વધારવા માટે લીલી ઝંડી આપી દીધી છે. માત્ર બાળકોની રસી જ નહીં, પરંતુ કેન્સરની બે મહત્વની દવાઓ અને ટિટાનસ (ધનુર) ના ઇન્જેક્શનમાં પણ 50 ટકા સુધીનો વધારો કરવામાં આવ્યો છે. જોકે, નિષ્ણાતોનું કહેવું છે કે વાલીઓએ આ ભાવ વધારાથી ગભરાવાની જરૂર નથી, કારણ કે ભવિષ્યમાં દેશમાં આ દવાઓની અછત ન સર્જાય તે હેતુથી આ મહત્વનો નિર્ણય લેવામાં આવ્યો છે.
BCG ની રસી: નવજાત બાળકને ટીબી (ક્ષય) જેવી ગંભીર બીમારીના જોખમથી બચાવવા માટે જન્મતાની સાથે જ અથવા શરૂઆતના દિવસોમાં આ રસી આપવામાં આવે છે.
ઓરીની રસી: ઓરી એક અત્યંત ચેપી રોગ છે, જેમાં બાળકને સખત તાવ, શરીર પર ફોલ્લીઓ અને ન્યુમોનિયા થઈ શકે છે. આ રસી બાળકને તેનાથી સુરક્ષિત રાખે છે.
MR (ઓરી-રુબેલા) રસી: આ રસી ઓરી અને રુબેલા બંને સામે કવચ પૂરું પાડે છે. ખાસ કરીને ગર્ભવતી મહિલાઓમાં રુબેલાનું ઇન્ફેક્શન ગર્ભમાં રહેલા બાળક માટે જોખમી બની શકે છે, તેથી આ રસી અત્યંત અગત્યની મનાય છે.
હવે સવાલ એ થાય કે સરકારે અચાનક રસીના ભાવ કેમ વધાર્યા? NPPA ના જણાવ્યા મુજબ, આ રસીઓ બનાવતી કંપનીઓની સંખ્યા દેશમાં ખૂબ જ મર્યાદિત છે. સામે પક્ષે રસી બનાવવા પાછળનો ખર્ચ સતત વધી રહ્યો છે. જો કિંમતોમાં સમયસર વધારો ન કરવામાં આવે તો, કંપનીઓ માટે ઉત્પાદન ચાલુ રાખવું મુશ્કેલ બની જાય અને ભવિષ્યમાં દેશમાં રસીનો પુરવઠો ખોરવાઈ શકે છે. એટલે કે, આ નિર્ણય કોઈ કંપનીઓને નફો કરાવવા માટે નહીં, પરંતુ બાળકોના રસીકરણમાં કોઈ બ્રેક ન વાગે તે સુનિશ્ચિત કરવા માટે લેવાયો છે.
બાળકોની રસી ઉપરાંત, કેન્સરની કીમોથેરાપીમાં વપરાતી બે અત્યંત જરૂરી દવાઓ – કાર્બોપ્લાટિન અને સિસ્પ્લેટિનના ભાવમાં પણ NPPA એ સીધો 50 ટકાનો વધારો મંજૂર કર્યો છે. તેનું મુખ્ય કારણ એ છે કે આ દવાઓ બનાવવા માટે વપરાતા એક્ટિવ ફાર્માસ્યુટિકલ ઇન્ગ્રેડિયન્ટ્સ (API) એટલે કે કાચા માલના ભાવમાં મોટો ઉછાળો આવ્યો છે.
આ સાથે જ, 250 IU અને 500 IU પાવર વાળા એન્ટી-ટિટાનસ (ધનુર) ઇમ્યુનોગ્લોબ્યુલિન ઇન્જેક્શન પણ 50 ટકા મોંઘા થઈ ગયા છે. લાંબા સમયથી દવા બનાવતી કંપનીઓ વધતા ખર્ચને લીધે પ્રોડક્શનમાં પડતી મુશ્કેલીઓની ફરિયાદ કરી રહી હતી, જેને ધ્યાનમાં રાખીને અંતે આ ભાવ વધારો ઝીંકવામાં આવ્યો છે.