IPL 2026: આજે RCB અને GT વચ્ચે ફાઇનલ, વિજેતા ટીમ પર થશે ધનવર્ષા, જાણો રનર-અપને કેટલા મળશે પૈસા

આઈપીએલ 2026 ની ફાઇનલ મેચ આજે રોયલ ચેલેન્જર્સ બેંગલુરુ (RCB) અને ગુજરાત ટાઇટન્સ (GT) વચ્ચે રમાશે. શુભમન ગિલ કેપ્ટન તરીકે પોતાની પ્રથમ ટ્રોફી જીતવા ઈચ્છશે, તેની ટીમ GT એ 2022 માં હાર્દિક પંડ્યાની કેપ્ટનશીપ હેઠળ પોતાનો પ્રથમ ખિતાબ જીત્યો હતો. બીજી તરફ રજત પાટીદારની કેપ્ટનશીપમાં RCB એ ગયા વર્ષે પોતાનો પહેલો ખિતાબ જીત્યો હતો અને આ ટીમ સતત બીજી વખત ફાઇનલમાં પહોંચી છે. જાણો ચેમ્પિયન બનનારી ટીમને કેટલી ઇનામી રકમ મળશે અને ફાઇનલમાં હારનારી ટીમના ભાગે કેટલી રકમ આવશે?

ફિલ સોલ્ટના રમવા પર સસ્પેન્સ યથાવત છે, પરંતુ રોયલ ચેલેન્જર્સ બેંગલુરુ પોતાના વિનિંગ કોમ્બિનેશનમાં ફેરફાર ન કરીને પણ ખુશ રહેશે. વિરાટ કોહલીની સાથે વેંકટેશ અય્યર ઓપનિંગ કરી શકે છે, જેને આ સીઝનમાં બહુ ઓછી તકો મળી છે પરંતુ તેણે ટીમને ઝડપી શરૂઆત અપાવી છે. ગુજરાત ટાઇટન્સની પ્લેઇંગ 11 માં પણ ફેરફારની શક્યતા નહિવત છે. બંને ટીમો આજે પોતાના બીજા ખિતાબ માટે મેદાનમાં ઉતરશે, જેમાંથી કોઈ એકનું સપનું તૂટશે. અહીં અમે તમને વિનર અને રનર્સ-અપની પ્રાઇઝ મની વિશે જણાવી રહ્યા છીએ.

IPL ની પ્રથમ સીઝનમાં ચેમ્પિયન બનવા પર રાજસ્થાન રોયલ્સને 4.8 કરોડ રૂપિયા મળ્યા હતા. આજે વિનરની ઇનામી રકમ 4 ગણીથી પણ વધુ વધી ગઈ છે. IPL 2026 નો ખિતાબ જીતનારી ટીમને 20 કરોડ રૂપિયાની પ્રાઇઝ મની મળશે.

IPL 2026 રનર્સ-અપ ટીમને કેટલા રૂપિયા મળશે?
રોયલ ચેલેન્જર્સ બેંગલુરુ કે ગુજરાત ટાઇટન્સ, જે પણ ટીમ IPL 2026 ની ફાઇનલ હારશે તેને પણ કરોડો રૂપિયા મળશે. રનર્સ-અપ રહેનારી ટીમને 13 કરોડ રૂપિયાની પ્રાઇઝ મની આપવામાં આવશે.

આ સિવાય પ્લેઓફ સુધી પહોંચનારી અન્ય 2 ટીમોને પણ ઇનામી રકમ મળશે. રાજસ્થાન રોયલ્સ ક્વોલિફાયર-2 સુધી પહોંચી હતી, તેથી આ ટીમને 7 કરોડ રૂપિયા અને સનરાઇઝર્સ હૈદરાબાદને 6.5 કરોડ રૂપિયા મળશે. SRH એલિમિનેટર મેચમાં હારીને બહાર થઈ ગઈ હતી.