‘દેશમાં પેટ્રોલ મોંઘું થયું અને અંબાણી વિદેશમાં નિકાસ કરીને મોદીજીને આપે છે ફંડ’, રાહુલ ગાંધીનો ગંભીર આક્ષેપ

લોકસભામાં વિપક્ષના નેતા (LoP) અને કોંગ્રેસના સાંસદ રાહુલ ગાંધીએ વડાપ્રધાન નરેન્દ્ર મોદી અને અગ્રણી ઉદ્યોગપતિ મુકેશ અંબાણી પર આકરા પ્રહારો કર્યા છે. દેશમાં વધી રહેલી પેટ્રોલ-ડીઝલની કિંમતો અને મોંઘવારીના મુદ્દે સરકારને ઘેરતા તેમણે એક મોટું અને વિવાદાસ્પદ નિવેદન આપ્યું છે. રાહુલ ગાંધીએ ચૂંટણી પહેલા આપેલા વચનો અને વર્તમાન પરિસ્થિતિની સરખામણી કરતા સરકારની નીતિઓ પર સવાલો ઉઠાવ્યા હતા.

ચૂંટણી પહેલાના દાવા અને આજની વાસ્તવિકતા

પોતાના નિવેદનમાં રાહુલ ગાંધીએ જણાવ્યું કે, ચૂંટણી પહેલા એવું કહેવામાં આવતું હતું કે દેશમાં પેટ્રોલ કે ગેસની કોઈ અછત નથી. પેટ્રોલના ભાવ વધશે નહીં. પરંતુ આજે જ્યારે પેટ્રોલના ભાવ સતત વધી રહ્યા છે, ત્યારે અંબાણી ભારતમાંથી પેટ્રોલ વિદેશમાં નિકાસ કરી રહ્યા છે.

પીએમ મોદી અને અંબાણીના સંબંધો પર પ્રહાર

કોંગ્રેસ નેતાએ આગળ ગંભીર આક્ષેપ કરતા કહ્યું કે, અંબાણી રશિયા પાસેથી સસ્તું ક્રૂડ ઓઈલ ખરીદે છે અને તેને રિફાઈન કરીને વિદેશી બજારોમાં ઊંચા ભાવે વેચે છે. તેમણે દાવો કર્યો કે, અંબાણી રશિયાથી પેટ્રોલ ખરીદીને ભારતની બહાર વેચી રહ્યા છે. તેમાંથી જે તગડી કમાણી થાય છે, તે પૈસાનો ઉપયોગ વડાપ્રધાન નરેન્દ્ર મોદીને ફંડ (નાણાકીય મદદ) આપવા માટે કરવામાં આવે છે. રાહુલ ગાંધીએ ભારપૂર્વક કહ્યું, “આ જ સાચી હકીકત છે.”

આ મામલે સત્તાધારી પક્ષ કે સંબંધિત બિઝનેસ ગ્રૂપ તરફથી હજુ સુધી કોઈ સત્તાવાર પ્રતિક્રિયા સામે આવી નથી. આ નિવેદન બાદ રાજકીય ગરમાવો વધવાની પૂરેપૂરી શક્યતા છે.