RCB બીજી વખત WPL ચેમ્પિયન બની, સ્મૃતિ મંધાનાની કપ્તાનીમાં ઈતિહાસ રચ્યો 

રોયલ ચેલેન્જર્સ બેંગ્લોરે બીજી વખત મહિલા  પ્રીમિયર લીગનો ખિતાબ જીત્યો છે. WPL 2026 ની અંતિમ મેચમાં RCB એ દિલ્હી કેપિટલ્સને છ વિકેટથી હરાવ્યું. 2024 પછી આ બીજી વખત છે જ્યારે બેંગ્લોરની ટીમે ટાઇટલ જીત્યું છે.

ટોસ હાર્યા બાદ પ્રથમ બેટિંગ કરતા દિલ્હી કેપિટલ્સે 20 ઓવરમાં 4 વિકેટે 203 રન બનાવ્યા. જવાબમાં, RCB એ ગુરુવારે વડોદરાના કોટંબી સ્ટેડિયમ ખાતે રમાયેલી મેચમાં 19.4 ઓવરમાં 4 વિકેટે 204 રન બનાવીને જીત મેળવી હતી.

મહિલા  પ્રીમિયર લીગ ફાઇનલમાં પ્રથમ બેટિંગ કરતા દિલ્હી કેપિટલ્સે 203 રન બનાવ્યા હતા. મહિલા પ્રીમિયર લીગ ફાઇનલના ઇતિહાસમાં આ કોઈપણ ટીમ દ્વારા સૌથી મોટો સ્કોર હતો. જોકે, RCB એ ફાઇનલમાં સૌથી વધુ રન ચેઝ કરવાનો રેકોર્ડ બનાવ્યો.

RCB બીજી વખત ચેમ્પિયન બન્યું 

રોયલ ચેલેન્જર્સ બેંગ્લોરે પ્રથમ વખત 2024 માં  WPL ટ્રોફી જીતી. તે સમયે ફાઇનલમાં બેંગલુરુએ દિલ્હી કેપિટલ્સને 8 વિકેટથી હરાવ્યું હતું.  બે વર્ષ પછી રોયલ ચેલેન્જર્સ બેંગ્લોરે 204 રનના રેકોર્ડ લક્ષ્યનો પીછો કરીને ઇતિહાસ રચ્યો.

કેપ્ટન સ્મૃતિ મંધાનાએ 47 બોલમાં 81 રન બનાવ્યા, જ્યારે જ્યોર્જિયા વોલે 79 રનનું યોગદાન આપ્યું. મંધાના અને વોલ વચ્ચેની ઐતિહાસિક 165 રનની ભાગીદારીએ બીજી વખત RCB ચેમ્પિયન બનાવવામાં મોટી ભૂમિકા ભજવી હતી.