અફઘાનિસ્તાન અને પાકિસ્તાન વચ્ચે વધતા તણાવ વચ્ચે અમેરિકાના રાષ્ટ્રપતિ ડોનાલ્ડ ટ્રમ્પનું નિવેદન ચર્ચાનો વિષય બન્યું છે. વાસ્તવમાં ટ્રમ્પે સ્પષ્ટ શબ્દોમાં કહ્યું કે, જરૂર પડશે તો તેઓ આ મામલે હસ્તક્ષેપ કરશે. તેમણે પાકિસ્તાન સાથેના પોતાના સારા સંબંધોનો ઉલ્લેખ કર્યો અને ઇસ્લામાબાદના નેતૃત્વની પ્રશંસા કરી.
ટ્રમ્પે પાકિસ્તાનના વડાપ્રધાન Shahbaz Sharif અને સેનાના વડા Asim Munir વિશે સકારાત્મક શબ્દો કહ્યા. તેમના અનુસાર પાકિસ્તાન હાલ સુરક્ષા મામલાઓમાં ઉત્તમ કામગીરી કરી રહ્યું છે. જોકે જ્યારે તેમને પૂછાયું કે, શું પાકિસ્તાને સીધો હસ્તક્ષેપ માંગ્યો છે, ત્યારે ટ્રમ્પે સીધો જવાબ આપ્યો નહોતો પરંતુ મૈત્રીપૂર્ણ સંબંધોનો જ ઉલ્લેખ કર્યો.
ટ્રમ્પના નિવેદન બાદ અમેરિકાના સ્ટેટ ડિપાર્ટમેન્ટ તરફથી પણ પ્રતિસાદ આવ્યો. રાજકીય બાબતોની નાયબ સચિવ Allison M. Hookerએ પાકિસ્તાન સાથે વાતચીત કરી અને તાજેતરના હુમલાઓમાં થયેલા જાનહાનિ પર સંવેદના વ્યક્ત કરી. તેમણે જણાવ્યું કે, આતંકવાદી હુમલાઓ સામે પોતાનો બચાવ કરવાનો પાકિસ્તાનને અધિકાર છે અને અમેરિકા પરિસ્થિતિ પર નજીકથી નજર રાખી રહ્યું છે.
પાકિસ્તાનમાં આવેલા અમેરિકન દૂતાવાસે વધતા તણાવને ધ્યાનમાં રાખીને પોતાના નાગરિકો માટે એડવાઈઝરી જાહેર કરી છે. મુખ્ય શહેરોમાં સુરક્ષા વધારવામાં આવી છે અને સૈનિક મથકો, સરકારી કચેરીઓ તથા મોટા વ્યાપારિક વિસ્તારોને સંભવિત નિશાન તરીકે ગણાવવામાં આવ્યા છે. અમેરિકન નાગરિકોને સાવચેત રહેવાની સલાહ આપવામાં આવી છે.
https://www.instagram.com/timenewsguj