પશ્ચિમ બંગાળ વિધાનસભા ચૂંટણીના પરિણામો પછી રાજ્યના ઘણા ભાગોમાં હિંસાના બનાવો નોંધાયા હતા. મંગળવાર (5 મે) ના રોજ કોલકાતાના પ્રખ્યાત હૉગ માર્કેટમાં અફરાતફરી મચી ગઈ હતી. રાત્રે 9 વાગ્યાની આસપાસ કેટલાક લોકો બુલડોઝર લઈને ઇમારત તોડી પાડવા પહોંચ્યા હતા. ટીએમસીના યુનિયન પાર્ટી કાર્યાલયને જમીનદોસ્ત કરવામાં આવ્યું હતું. ટીએમસીનો આરોપ છે કે કોલકાતાના હૉગ માર્કેટમાં ભાજપના કાર્યકરોએ ઘણી દુકાનો બુલડોઝરથી તોડી પાડી હતી.અગાઉ ચૂંટણી પંચે પશ્ચિમ બંગાળના મુખ્ય સચિવ, પોલીસ મહાનિર્દેશક અને રાજ્યમાં તૈનાત કેન્દ્રીય સશસ્ત્ર પોલીસ દળોને ચૂંટણી પછીની હિંસા પ્રત્યે ઝીરો ટોલરન્સઅભિગમ અપનાવવાનો નિર્દેશ આપ્યો હતો. ચૂંટણી પરિણામોની ઘોષણા પછી સોમવાર સાંજથી રાજ્યના ઘણા ભાગોમાં હિંસાના અહેવાલો સામે આવ્યા બાદ આ નિર્દેશ આપવામાં આવ્યો હતો.
ટીએમસીએ આરોપ લગાવ્યો છે કે તેની ઘણી પાર્ટી કાર્યાલયોમાં તોડફોડ કરવામાં આવી હતી અને તેના કાર્યકરો પર હુમલો કરવામાં આવ્યો હતો. દક્ષિણ કોલકાતાના ટોલીગંજ વિસ્તારમાં ભૂતપૂર્વ ટીએમસી ધારાસભ્ય અરૂપ બિશ્વાસના પાર્ટી કાર્યાલયમાં પણ તોડફોડ કરવામાં આવી હતી. બેલિયાઘાટા વિસ્તારમાં ટીએમસી કાર્યાલયમાં પણ તોડફોડ કરવામાં આવી હતી અને એક કાર્યકરને માર મારવામાં આવ્યો હતો. ટીએમસીએ એવો પણ દાવો કર્યો હતો કે આમ્તલા સ્થિત અભિષેક બેનર્જીની કાર્યાલય પર પણ ટોળા દ્વારા હુમલો કરવામાં આવ્યો હતો.
કોલકાતા પોલીસે સોશિયલ મીડિયા પર નકલી અથવા ભડકાઉ પોસ્ટ ફેલાવનારાઓ સામે કાનૂની કાર્યવાહી કરવાની ચેતવણી આપી હતી. પોલીસે જણાવ્યું હતું કે શહેરમાં પરિસ્થિતિ નિયંત્રણમાં છે અને લોકોને આવી પોસ્ટ શેર ન કરવા વિનંતી કરી હતી. ચૂંટણી પરિણામો પછી હિંસાનો દાવો કરતા સોશિયલ મીડિયા પર ઘણા ફોટા અને વીડિયો ફરતા થયા બાદ આ ચેતવણી જાહેર કરવામાં આવી હતી.
ટીએમસી સાંસદ મહુઆ મોઇત્રાએ ન્યૂ માર્કેટ વિસ્તારમાં થયેલી હિંસા અને બુલડોઝર કાર્યવાહી અંગે સોશિયલ મીડિયા પર પોતાનો ગુસ્સો વ્યક્ત કર્યો. તેમણે સોશિયલ મીડિયા પોસ્ટમાં લખ્યું હતું કે, “કોલકાતાનું ઐતિહાસિક ન્યૂ માર્કેટ. બંગાળીઓ પરિવર્તનનો આનંદ માણી રહ્યા છે.”
ટીએમસીના વરિષ્ઠ નેતા ડેરેક ઓ’બ્રાયને પણ આરોપ લગાવ્યો હતો કે સરકારી દેખરેખ હેઠળ તોડફોડ કરવામાં આવી હતી. સોશિયલ મીડિયા પોસ્ટમાં તેમણે કહ્યું, “વિજય ઉજવણીના ભાગ રૂપે પોલીસની પરવાનગીથી મધ્ય કોલકાતાના ન્યૂ માર્કેટ નજીક મીટની દુકાનો તોડી પાડવા માટે બુલડોઝર લાવવામાં આવ્યું હતું. સીએપીએફના જવાનો નજીકમાં ઉભા હતા.” તેમણે ઉમેર્યું, “આ ભાજપ છે. દુનિયાએ આ તસવીરો જોવી જોઈએ.”