અમદાવાદના નારણપુરા સ્થિત વીર સાવરકર સ્ટેડિયમ ખાતે 23થી 31 ઑક્ટોબર 2026 દરમિયાન યોજાઈ રહેલી પ્રથમ કોમનવેલ્થ કબડ્ડી ચેમ્પિયનશિપ 2026માં ભારતીય કોચ મણિકરાજ મુદિરાજના માર્ગદર્શન હેઠળ શ્રીલંકાની મહિલા કબડ્ડી ટીમે સેમિફાઇનલમાં સ્થાન મેળવ્યું છે.
મણિકરાજ મુદિરાજ ભારતીય રમત પ્રાધિકરણ (SAI)ના ગુજરાતના ગાંધીનગર સ્થિત નેશનલ સેન્ટર ઑફ એક્સેલન્સ (NCOE)માં સહાયક કબડ્ડી કોચ તરીકે કાર્યરત છે. તેમને કબડ્ડીની રણનીતિ, ઝડપ, ચપળતા, રક્ષણાત્મક વ્યૂહરચના અને રેડિંગ ટેકનિકમાં વિશેષ અનુભવ અને નિપુણતા પ્રાપ્ત છે.
આ અગાઉ, મણિકરાજ 19મી એશિયન ગેમ્સ માટે મલેશિયાની પુરુષ રાષ્ટ્રીય કબડ્ડી ટીમના મુખ્ય કોચ તરીકે સેવા આપી ચૂક્યા છે. આ ઉપરાંત, તેલંગાણામાં પોતાના કોચિંગ અનુભવ દ્વારા તેમણે સ્થાનિક સ્તરે કબડ્ડીની પ્રતિભાઓને વિકસાવવામાં પણ યોગદાન આપ્યું છે.
એમેચ્યોર કબડ્ડી ફેડરેશન ઑફ ઇન્ડિયા (AKFI)એ ભારતીય રમત પ્રાધિકરણ (SAI)ના સંકલનથી આ પ્રતિષ્ઠિત ચેમ્પિયનશિપમાં શ્રીલંકાની પુરુષ અને મહિલા કબડ્ડી ટીમોના કોચ તરીકે મણિકરાજની નિમણૂક કરી છે. તેમની નિમણૂક આંતરરાષ્ટ્રીય સ્તરે કબડ્ડીના વિકાસમાં ભારતીય કોચિંગ નિપુણતાની વધતી ભૂમિકાને દર્શાવે છે.
શ્રીલંકાની મહિલા ટીમે સ્પર્ધામાં શાનદાર પ્રદર્શન કરતાં ગ્રુપ બીના મુકાબલામાં બાંગ્લાદેશને 29–19થી હરાવ્યું હતું અને પોતાના પ્રભાવશાળી પ્રદર્શનના આધારે સેમિફાઇનલમાં પ્રવેશ મેળવ્યો હતો.
કોચ મણિકરાજે વ્યક્ત કર્યો આભાર
ટીમની આ સિદ્ધિ અંગે ખુશી વ્યક્ત કરતાં મણિકરાજ મુદિરાજે ભારતીય રમત પ્રાધિકરણ (SAI) અને એમેચ્યોર કબડ્ડી ફેડરેશન ઑફ ઇન્ડિયા (AKFI)ના સહયોગ અને વિશ્વાસ બદલ આભાર વ્યક્ત કર્યો હતો.
તેમણે જણાવ્યું હતું કે, “પ્રથમ કોમનવેલ્થ કબડ્ડી ચેમ્પિયનશિપ 2026માં શ્રીલંકાની પુરુષ અને મહિલા કબડ્ડી ટીમોના કોચ તરીકે સેવા આપવા માટે મને કાર્યમુક્ત કરવા બદલ હું ભારતીય રમત પ્રાધિકરણ, NCOE ગાંધીનગર, ગુજરાતનો હૃદયપૂર્વક આભાર માનું છું.
“આ મૂલ્યવાન આંતરરાષ્ટ્રીય કોચિંગ તક આપવા બદલ હું AKFIનો પણ ખૂબ આભારી છું. શ્રીલંકાની મહિલા કબડ્ડી ટીમ સેમિફાઇનલમાં પહોંચી છે તે બદલ મને ખૂબ ગર્વ છે. આંતરરાષ્ટ્રીય મંચ પર ભારતીય કોચિંગ નિપુણતાનું પ્રતિનિધિત્વ કરવું અને વિવિધ દેશોમાં કબડ્ડીના વિકાસમાં યોગદાન આપવું મારા માટે ગૌરવની વાત છે.”
મણિકરાજ મુદિરાજની આ કોચિંગ નિમણૂક આંતરરાષ્ટ્રીય રમતગમત સહયોગ, વ્યાવસાયિક નિપુણતા અને રાષ્ટ્રીય સીમાઓથી પર કબડ્ડીની સહિયારી રમતભાવનાના મહત્વને ઉજાગર કરે છે.