જમ્મુ અને કાશ્મીરના રાજૌરી જિલ્લાના સુંદરબનીમાં સેનાના વાહન પર આતંકવાદી હુમલો થયો છે. આ વિસ્તારમાંથી સેનાનું એક વાહન પસાર થઈ રહ્યું હતું. આ દરમિયાન ઘાત લગાવીને બેઠેલા આતંકવાદીઓએ સેનાના વાહન પર હુમલો કર્યો. અત્યાર સુધી મળેલી માહિતી અનુસાર આતંકવાદીઓએ જંગલમાંથી જ વાહનને ટાર્ગેટ કરીને અનેક રાઉન્ડ ફાયરિંગ કર્યું હતું.
આતંકીઓના ફાયરિંગનાજવાબમાં સેનાના જવાનોએ પણ કાર્યવાહી કરી છે. સમગ્ર વિસ્તારને ઘેરી લેવામાં આવ્યો છે. આતંકવાદીઓ સામે સર્ચ ઓપરેશન ચલાવવામાં આવી રહ્યું છે. આ હુમલો બુધવારે બપોરે લગભગ 1 વાગ્યે થયો હતો. આ હુમલો ફહલ ગામમાં પાણીની ટાંકી પાસે થયો હતો. આ ગામ સુંદરબની મલ્લા રોડ પર આવેલું છે.
જમ્મુ-કાશ્મીરના રાજૌરીમાં આતંકવાદીઓએ સેનાના વાહન પર હુમલો કર્યો છે. સુંદરબની વિસ્તારમાં આતંકવાદીઓએ સેનાના વાહન પર ગોળીબાર કર્યો છે. આ હુમલો બપોરે 1 વાગ્યાની આસપાસ થયો હતો. આતંકવાદીઓએ સેનાના વાહન પર લગભગ બે રાઉન્ડ ગોળીબાર કર્યો. સેનાનું વાહન પેટ્રોલિંગ કરી રહ્યું હતું. આ દરમિયાન આતંકીઓએ સૈન્ય વાહનને ટાર્ગેટ કર્યું હતું.
સર્ચ ઓપરેશન શરૂ
શંકાસ્પદ આતંકવાદીઓએ ગાઢ જંગલમાંથી સેનાની ગાડી પર ગોળીબાર કર્યો હતો. સુરક્ષા દળોએ વિસ્તારને ઘેરી સર્ચ ઓપરેશન હાથ ધર્યું છે. સુંદરબનીમાં સીઆરપીએફ બટાલિયનના હેડક્વાર્ટર્સથી આશરે પાંચ-છ કિમી દૂર આ ઘટના બની હતી.
એવું કહેવામાં આવ્યું હતું કે સુંદરબની વિસ્તાર જ્યાં આ હુમલો થયો હતો તે LoC ને અડીને આવેલો છે. સવારથી અહીં સર્ચ ઓપરેશન ચાલી રહ્યું હતું. આ દરમિયાન સેનાના વાહન પર હુમલો કરવામાં આવ્યો. જોકે, સેનાએ હજુ સુધી આ વાતની સત્તાવાર પુષ્ટિ કરી નથી. આ વિસ્તાર પાકિસ્તાન સરહદને અડીને આવેલો છે, તેથી પોલીસને હાલમાં ત્યાં જવાની મંજૂરી નહોતી. સેના પોતે ત્યાં સર્ચ ઓપરેશન ચલાવી રહી છે. સમગ્ર વિસ્તારમાં હાઇ એલર્ટ જાહેર કરવામાં આવ્યું છે. ગોળીબાર ફક્ત એક જ બાજુથી થયો હતો. ગોળીબાર પછી હુમલાખોરો તરત જ ભાગી ગયા હતા અને નજીકના વિસ્તારોમાં છુપાઈ ગયા હતા. સેનાના જવાનોને બદલો લેવાની તક પણ મળી નહીં.