રાજ્યમાં હાલ શિયાળાનો મિજાજ યથાવત છે અને આગામી સાત દિવસ સુધી તાપમાનમાં કોઈ ખાસ ફેરફાર થવાની શક્યતા નથી. અમદાવાદ હવામાન વિભાગના ડાયરેક્ટર એ.કે. દાસે જણાવ્યું છે કે, હાલ રાજ્યમાં ઉત્તર-ઉત્તરપૂર્વ દિશાથી ઠંડા પવનો ફૂંકાઈ રહ્યા છે, જેના કારણે ઠંડીનો પ્રભાવ યથાવત રહેશે.
અમદાવાદ શહેરમાં છેલ્લા કેટલાક દિવસથી લઘુત્તમ તાપમાન 14 ડિગ્રી સેલ્સિયસ આસપાસ નોંધાઈ રહ્યું છે. હવામાન વિભાગની આગાહી મુજબ આગામી દિવસોમાં પણ લઘુત્તમ તાપમાનમાં ખાસ ઘટાડો કે વધારો નહીં થાય અને હાલની જ સ્થિતિ ચાલુ રહેશે.
કચ્છના નલિયામાં શિયાળાની ઠંડી વધુ અસરકારક જણાઈ રહી છે. અહીં લઘુત્તમ તાપમાન 10 ડિગ્રી સેલ્સિયસ સુધી પહોંચ્યું છે. આવતા દિવસોમાં પણ નલિયામાં ઠંડીનો પ્રભાવ તીવ્ર જ રહેવાનો અંદાજ છે.
સૌરાષ્ટ્ર અને કચ્છ વિસ્તારમાં સામાન્ય કરતા નીચું તાપમાન નોંધાઈ રહ્યું છે. હવામાન વિભાગ મુજબ આ વિસ્તારોમાં આગામી દિવસોમાં ઠંડીમાં વધુ વધારો થઈ શકે છે. હળવા પવન અને સ્વચ્છ આકાશને કારણે રાત્રી દરમ્યાન તાપમાન વધારે ઘટવાની શક્યતા છે.