દક્ષિણ ગુજરાતમાં મેઘરાજાએ ફરી એકવાર તોફાની બેટિંગ કરતાં વલસાડ અને નવસારી જિલ્લામાં ધોધમાર વરસાદ નોંધાયો છે. વલસાડ જિલ્લાના પારડીમાં સૌથી વધુ 8.19 ઈંચ વરસાદ વરસતાં અનેક વિસ્તારોમાં જળબંબાકારની સ્થિતિ સર્જાઈ હતી, જ્યારે વાપી, વલસાડ, ધરમપુર અને નાના પોંઢામાં પણ ભારે વરસાદ ખાબક્યો હતો. ઉપરવાસમાં પડેલા વરસાદના કારણે ઔરંગા નદી બે કાંઠે વહેતી થઈ છે, જ્યારે નવસારી જિલ્લામાં પણ ખેરગામ, જલાલપોર અને ચીખલી સહિતના વિસ્તારોમાં ભારે વરસાદથી જનજીવન પ્રભાવિત થયું છે.
છેલ્લા 24 કલાકમાં વલસાડ જિલ્લાના તમામ તાલુકાઓમાં મેઘરાજાએ મન મુકીને વરસાદ વરસાવ્યો છે. જિલ્લામાં પારડીમાં સૌથી વધુ 8.19 ઈંચ વરસાદ નોંધાયો છે. આ ઉપરાંત નાના પોંઢામાં 7.17 ઈંચ, વાપીમાં 7.17 ઈંચ, વલસાડમાં 7.05 ઈંચ, ધરમપુરમાં 6.50 ઈંચ અને કપરાડામાં 4.61 ઈંચ વરસાદ વરસ્યો છે.
વાપીમાં મોડી રાત્રે પડેલા ધોધમાર વરસાદને કારણે ચલા, મુક્તાનંદ માર્ગ, દમણ રોડ સહિતના અનેક વિસ્તારોમાં પાણી ભરાઈ ગયા હતા. ભારે વરસાદ અને વીજળીના કડાકા-ભડાકા વચ્ચે વાહનચાલકો અને સ્થાનિક લોકોને ભારે હાલાકીનો સામનો કરવો પડ્યો હતો. કેટલીક રહેણાંક સોસાયટીઓમાં પણ વરસાદી પાણી ઘૂસી જતાં લોકો મુશ્કેલીમાં મુકાયા હતા. ઉપરવાસમાં પડેલા ભારે વરસાદના કારણે વલસાડની ઔરંગા નદી બે કાંઠે વહેતી થઈ છે. નદીના જળસ્તરમાં વધારો થતાં તંત્રે લોકોને નદીના પટમાં ન જવા અને સાવચેતી રાખવા અપીલ કરી છે.
વલસાડ જિલ્લામાં અત્યાર સુધી સીઝનનો કુલ 44.30 ઈંચ વરસાદ નોંધાયો છે. જેમાં પારડીમાં સૌથી વધુ 53 ઈંચ, વલસાડમાં 52.56 ઈંચ, ઉમરગામમાં 52.17 ઈંચ, વાપીમાં 46.24 ઈંચ, કપરાડામાં 40.59 ઈંચ, નાના પોંઢામાં 37.44 ઈંચ અને ધરમપુરમાં 32.69 ઈંચ વરસાદ નોંધાયો છે.