આજે બંગાળના મુખ્યમંત્રી તરીકે સુવેન્દુ અધિકારીએ શપથ ગ્રહણ કર્યા હતા. પશ્ચિમ બંગાળના કોલકાતા સ્થિત બ્રિગેડ પરેડ ગ્રાઉન્ડ ખાતે યોજાયેલા ભાજપ સરકારના ભવ્ય શપથ ગ્રહણ સમારોહ દરમિયાન એક ભાવુક અને યાદગાર ક્ષણ જોવા મળી. નવા મુખ્યમંત્રી તરીકે શપથ લેતા સુવેન્દુ અધિકારીના કાર્યક્રમ દરમિયાન સ્ટેજ પર પહોંચતા જ વડા પ્રધાન મોદીએ એક વરિષ્ઠ વ્યક્તિને ગળે લગાવી તેમના ચરણ સ્પર્શ કર્યા. આ દ્રશ્યે ત્યાં હાજર તમામ લોકોને ભાવુક બનાવી દીધા. વૃદ્ધ કાર્યકરની આંખોમાં આંસુ આવી જતા સમગ્ર માહોલમાં લાગણીસભર વાતાવરણ સર્જાઈ ગયું.
વિગતો મુજબ આ વરિષ્ઠ કાર્યકર પશ્ચિમ બંગાળ ભાજપના સૌથી જૂના અને અનુભવી કાર્યકરોમાંના એક માખનલાલ સરકાર હોવાનું જાણવા મળ્યું છે. જનસંઘના જૂના સ્વયંસેવક 98 વર્ષીય માખનલાલ સરકારને ભારતીય રાષ્ટ્રવાદી ચળવળના પ્રારંભિક સમયના કાર્યકરોમાં ગણવામાં આવે છે. તેઓએ દેશની સ્વતંત્રતા બાદ પણ રાજકીય અને સંગઠનાત્મક સ્તરે મહત્વપૂર્ણ ભૂમિકા ભજવી છે.
અહેવાલો મુજબ માખનલાલ સરકારે 1952માં કાશ્મીરમાં ત્રિરંગા ફરકાવવાના આંદોલનમાં શ્યામા પ્રસાદ મુખર્જી સાથે ભાગ લીધો હતો, જ્યાં તેઓની ધરપકડ પણ થઈ હતી. 1980માં ભાજપની સ્થાપના પછી તેમણે પશ્ચિમ બંગાળના અનેક જિલ્લાઓમાં સંગઠન સંયોજક તરીકે જવાબદારી સંભાળી હતી. માત્ર એક વર્ષમાં તેમણે હજારો નવા કાર્યકરોને જોડીને પાર્ટીને મજબૂત બનાવવા મહત્વપૂર્ણ યોગદાન આપ્યું હતું.
પછીના વર્ષોમાં તેમણે સતત સાત વર્ષ સુધી જિલ્લા પ્રમુખ તરીકે સેવા આપી, જે સમયગાળો ભાજપના સંગઠન ઇતિહાસમાં વિશેષ માનવામાં આવે છે. સામાન્ય રીતે બે વર્ષથી વધુ કોઈ સંગઠનાત્મક પદ પર રહેવું મુશ્કેલ ગણાતું હતું, ત્યારે તેમનું લાંબું નેતૃત્વ નોંધપાત્ર માનવામાં આવે છે.