સંરક્ષણ મંત્રાલયે ભારતીય સેનાની હવાઈ સુરક્ષા મજબૂત કરવા માટે બુધવારે ભારત ઇલેક્ટ્રોનિક્સ લિમિટેડ (BEL) સાથે આશરે 770 કરોડ રૂપિયાની ડીલ કરી છે. આ અંતર્ગત ઇમ્પ્રૂવ્ડ લો લેવલ લાઇટ વેઇટ રડાર (LLLR-I) ખરીદવામાં આવશે.
આ રડાર ફાઇટર જેટ સાથે અત્યંત નાના ડ્રોનને પણ શોધી તેમની ગતિવિધિઓને ટ્રેક કરી શકશે. આ રડાર હવાઈ લક્ષ્યોની ઓળખ કરીને એ પણ નક્કી કરી શકશે કે કયા ખતરા પર પહેલાં ધ્યાન આપવું જરૂરી છે.
આથી દુશ્મનના ડ્રોનનો સામનો કરવામાં સેનાને મદદ મળશે. સાથે જ, દેશની હવાઈ સુરક્ષા મજબૂત થશે અને ભારતમાં સંરક્ષણ સાધનોના ઉત્પાદનને પ્રોત્સાહન મળશે.
રક્ષા મંત્રાલય મુજબ, ભારત ઇલેક્ટ્રોનિક્સ લિમિટેડ (BEL) પાસેથી આશરે 770 કરોડ રૂપિયાના રડાર ખરીદવાનો કરાર દેશમાં સંરક્ષણ ઉપકરણોના ઉત્પાદનને પ્રોત્સાહન આપશે.
આ ઉપરાંત, સ્થાનિક સંરક્ષણ ઉદ્યોગ અને સૂક્ષ્મ, લઘુ તથા મધ્યમ ઉદ્યોગોને (MSME) પણ તકો મળવાની આશા છે. આ પહેલ આત્મનિર્ભર ભારત અને મેક ઇન ઇન્ડિયાના લક્ષ્યોને અનુરૂપ છે.
15 ઑક્ટોબર: 4,106 કરોડ રૂપિયાની ડિફેન્સ ડીલ થઈ
રક્ષા મંત્રાલયે ભારતીય વાયુસેના અને નૌકાદળની ક્ષમતા વધારવા માટે આશરે 4,106 કરોડ રૂપિયાના બે રક્ષા કરારો કર્યા. તેમાં વાયુસેના માટે સંચાર ઉપગ્રહ અને નૌકાદળ માટે સબમરીન વિરોધી ટૉર્પીડોની ખરીદી સામેલ છે.
1. વાયુસેનાને મળશે ₹2,563 કરોડનો સંચાર ઉપગ્રહ
મંત્રાલયે ન્યૂ સ્પેસ ઇન્ડિયા લિમિટેડ (NSIL) સાથે GSAT-7C સંચાર ઉપગ્રહ માટે 2,563 કરોડ રૂપિયાનો કરાર કર્યો. સ્વદેશી રીતે વિકસાવવામાં આવેલા આ ઉપગ્રહથી વાયુસેનાનાં વિમાનો અને અન્ય સંસાધનો વચ્ચે સુરક્ષિત અને વધુ સારી સંચાર વ્યવસ્થા મજબૂત થશે.
2. નૌકાદળ માટે ₹1,543 કરોડના વરુણાસ્ત્ર ટૉર્પીડો
ભારત ડાયનેમિક્સ લિમિટેડ (BDL) સાથે 1,543 કરોડ રૂપિયાનો કરાર કરવામાં આવ્યો છે. આ હેઠળ નૌકાદળ માટે સ્વદેશી વરુણાસ્ત્ર હેવી વેઇટ ટોર્પિડો ખરીદવામાં આવશે. તેને જહાજ પરથી છોડીને દુશ્મનની સબમરીનોને નિશાન બનાવી શકાય છે. તેનાથી નૌકાદળની સબમરીન વિરોધી યુદ્ધ ક્ષમતા વધશે.