ભારતીય જનતા પાર્ટીના વરિષ્ઠ નેતા લાલ કૃષ્ણ અડવાણીને એપોલો હોસ્પિટલમાં દાખલ કરવામાં આવ્યા છે. તેમને છાતીમાં ઈન્ફેક્શન અને ઉંમર સંબંધિત સમસ્યાઓના કારણે હોસ્પિટલમાં દાખલ કરવામાં આવ્યા છે. અધિકારીઓએ જણાવ્યું હતું કે ભાજપના વરિષ્ઠ નેતા લાલ કૃષ્ણ અડવાણીને શુક્રવારે છાતીમાં ઈન્ફેક્શનની ફરિયાદ બાદ દાખલ કરવામાં આવ્યા હતા. તેમની સારવાર ચાલી રહી છે અને હાલમાં તેમની તબિયત સ્થિર છે. 98 વર્ષીય લાલ કૃષ્ણ અડવાણીને સાંજે 7:30 વાગ્યે હોસ્પિટલમાં લાવવામાં આવ્યા હતા અને તેમને ફેફસાના વિભાગમાં દાખલ કરવામાં આવ્યા હતા. ડોક્ટરોની એક ટીમ તેમની દેખરેખ રાખી રહી છે.
લાલ કૃષ્ણ અડવાણી ત્રણ વખત વર્ષ 1986-1990, 1993-1998 અને 2004-2005 પાર્ટીના પ્રમુખ રહી ચૂક્યા છે. તેમણે અટલ બિહારી વાજપેયીના નેતૃત્વ હેઠળની NDA સરકારમાં 1998 થી 2004 સુધી કેન્દ્રીય ગૃહમંત્રી અને 2002 થી 2004 સુધી નાયબ વડાપ્રધાન તરીકે જવાબદારી સંભાળી હતી.
અડવાણી 99 વર્ષના થવાના છે
ભાજપના દિગ્ગજ નેતા લાલકૃષ્ણ અડવાણી 98 વર્ષના છે. તેઓ 8 નવેમ્બરે પોતાનો 99મો જન્મદિવસ ઉજવવાના છે. લાલ કૃષ્ણ અડવાણી હાલમાં દિલ્હીના 30, પૃથ્વીરાજ રોડ સ્થિત તેમના નિવાસસ્થાને રહે છે. ગયા વર્ષે પણ લાલ કૃષ્ણ અડવાણીને એપોલો હોસ્પિટલના ICUમાં દાખલ કરવામાં આવ્યા હતા.
તાજેતરમાં, પ્રધાનમંત્રી નરેન્દ્ર મોદી જનસેવામાં 25 વર્ષ પૂર્ણ કર્યા બાદ લાલ કૃષ્ણ અડવાણીને મળવા અને તેમના આશીર્વાદ લેવા માટે તેમના નિવાસસ્થાને ગયા હતા. પીએમ મોદીએ X પર પોસ્ટ કરી કહ્યું હતું કે, “અડવાણીજી સાથે તેમના નિવાસસ્થાને મુલાકાત કરી અને તેમના આશીર્વાદ લીધા હતા. તેમની દાયકાઓની જાહેર સેવા અને આપણા રાષ્ટ્રીય જીવનમાં તેમના યોગદાને અમીટ છાપ છોડી છે. તેમણે ભારતની પ્રગતિને મજબૂત બનાવવામાં મહત્વપૂર્ણ ભૂમિકા ભજવી છે.”