પશ્ચિમ બંગાળની રાજધાની કોલકાતામાં દુર્ગા પૂજાના ઉત્સવ અને ઉમંગ વચ્ચે એક અત્યંત દુઃખદ અને હચમચાવી મૂકનારી ઘટના સામે આવી છે. ઉત્તર કોલકાતામાં આવેલા એક પ્રખ્યાત પૂજા પંડાલમાં અચાનક નાસભાગ મચી જવાથી 17 જેટલા નિર્દોષ શ્રદ્ધાળુઓનાં કરુણ મોત નીપજ્યા છે.
આ ભયાનક દુર્ઘટનામાં અન્ય 25 કરતાં વધુ લોકો ગંભીર રીતે ઘાયલ થયા હોવાના પ્રાથમિક અહેવાલો મળી રહ્યા છે. હાલમાં તમામ ઘાયલોને તાત્કાલિક ધોરણે સ્થાનિક હોસ્પિટલોમાં સારવાર માટે ખસેડવામાં આવ્યા છે, જ્યાં મેડિકલ ટીમ ખડે પગે તેમની જીવ બચાવવાની કામગીરી કરી રહી છે.
મળતી માહિતી મુજબ, આ હૃદયદ્રાવક ઘટના સાંજે 7:40 વાગ્યાની આસપાસ બની હતી. ગિરીશ પાર્ક પોલીસ સ્ટેશનની હદમાં આવેલા શારદા પાર્ક (ચોર બાગાન) પંડાલના એક્ઝિટ ગેટ પર બહાર નીકળવા માટે લોકોની ભારે ભીડ જમા થઈ ગઈ હતી, જેણે આ ગોઝારી દુર્ઘટના સર્જી હતી.
સ્થાનિક રહેવાસીઓ અને ઘટનાના પ્રત્યક્ષદર્શીઓના જણાવ્યા અનુસાર, પૂજા પંડાલની બહાર અચાનક જ ભારે વરસાદ શરૂ થઈ ગયો હતો. વરસાદથી બચવા માટે લોકો એકસાથે પંડાલની અંદરની તરફ દોડી ગયા હતા.
પંડાલમાં પહેલેથી જ દર્શનાર્થીઓની ભારે ભીડ હતી અને અચાનક બહારથી મોટી સંખ્યામાં લોકો અંદર ધસી આવતાં બહાર નીકળવાના ગેટ પર ભારે દબાણ ઊભું થયું. પાછળથી આવેલા લોકોના ધક્કાને કારણે આગળ ઊભેલા લોકો બેલેન્સ ગુમાવીને જમીન પર પટકાવા લાગ્યા હતા.
એક પ્રત્યક્ષદર્શીએ પોતાની આંખે દેખેલો અહેવાલ આપતા જણાવ્યું કે, આગળ પડેલા લોકો પર પાછળથી અન્ય લોકો પડવા લાગ્યા. એકબીજા પર કચડાઈ જવાના કારણે શ્વાસ લેવો મુશ્કેલ બની ગયો અને અનેક લોકો ગૂંગળામણથી ત્યાં જ બેહોશ થઈ ગયા. અંતે સ્થાનિક લોકોએ પંડાલનો બીજો ભાગ તોડીને ફસાયેલા લોકોને માંડ માંડ બહાર કાઢ્યા હતા.
હોસ્પિટલમાં ઈમરજન્સી અને નેતાઓની મુલાકાત
દુર્ઘટનાનો ભોગ બનેલા તમામ લોકોને તાત્કાલિક ધોરણે કોલકાતા મેડિકલ કોલેજ અને હોસ્પિટલમાં લઈ જવામાં આવ્યા હતા. હોસ્પિટલના સત્તાવાર સૂત્રોએ 17 લોકોનાં મોતની પુષ્ટિ કરી છે, જ્યારે 30 થી વધુ લોકો હાલમાં ત્યાં સારવાર હેઠળ છે.