ટી20 આંતરરાષ્ટ્રીય ક્રિકેટમાં ભારતીય મહિલા ટીમે ફરી એકવાર પોતાનું વર્ચસ્વ સાબિત કરતા કટ્ટર હરીફ પાકિસ્તાનને ધૂળ ચટાડી છે. 2026 મહિલા એશિયા કપની 9મી મેચમાં ટીમ ઈન્ડિયાએ શાનદાર પ્રદર્શન કરતા પાકિસ્તાનને 7 વિકેટે કારમો પરાજય આપ્યો છે. આ સાથે જ મહિલા ટી20 આંતરરાષ્ટ્રીય મેચોમાં ભારતનો પાકિસ્તાન સામે આ 15મો ઐતિહાસિક વિજય બન્યો છે. ભારતીય બોલરોના શિસ્તબદ્ધ અને આક્રમક પ્રદર્શન સામે પાકિસ્તાની બેટિંગ લાઇન-અપ પત્તાના મહેલની જેમ ધરાશાયી થઈ ગઈ હતી.
ટોસ જીતીને પ્રથમ બેટિંગ કરવાનો પાકિસ્તાનનો નિર્ણય તેમના માટે અત્યંત આત્મઘાતી સાબિત થયો હતો. ભારતીય બોલરોના તરખાટ સામે પાકિસ્તાનની આખી ટીમ 18.1 ઓવરમાં માત્ર 55 રનના નજીવા સ્કોર પર પેવેલિયન ભેગી થઈ ગઈ હતી. નોંધનીય છે કે, ટી20 આંતરરાષ્ટ્રીય ક્રિકેટના ઇતિહાસમાં પાકિસ્તાન મહિલા ટીમનો આ અત્યાર સુધીનો સૌથી ઓછો સ્કોર છે. ઇનિંગની શરૂઆતમાં પાકિસ્તાને પોતાની પ્રથમ વિકેટ 27 રનના સ્કોર પર ગુમાવી હતી. એક સમયે એવું લાગતું હતું કે તેઓ સન્માનજનક સ્કોર સુધી પહોંચશે, પરંતુ ત્યારબાદ માત્ર 28 રનના ગાળામાં જ તેમણે બાકીની 9 વિકેટો ગુમાવી દીધી હતી. ઓપનર શવલ ઝુલ્ફીકારે 3 ચોગ્ગાની મદદથી સૌથી વધુ 14 રન બનાવ્યા હતા, જ્યારે અન્ય ઓપનર મુનીબા અલીએ 13 રનનું યોગદાન આપ્યું હતું.
ભારતીય બોલિંગ આક્રમણ અત્યંત ઘાતક અને સચોટ રહ્યું હતું. યુવા બોલર શ્રી ચારાની અને પ્રેમા રાવતે જાદુઈ બોલિંગ કરતા અનુક્રમે 4 ઓવરમાં 7 રન અને 4 ઓવરમાં 9 રન આપીને 3-3 વિકેટ ઝડપીને પાકિસ્તાનની કમર તોડી નાખી હતી. આ ઉપરાંત, અનુભવી સ્પિનર દીપ્તિ શર્માએ 3.1 ઓવરમાં માત્ર 5 રન આપીને 2 વિકેટ અને શેફાલી વર્માએ 3 ઓવરમાં 10 રન આપીને 1 વિકેટ પોતાના નામે કરી હતી.
માત્ર 56 રનના આસાન લક્ષ્યાંકનો પીછો કરવા ઉતરેલી ભારતીય ટીમે ખૂબ જ આક્રમક શરૂઆત કરી હતી. આક્રમક ઓપનર શેફાલી વર્માએ ઇનિંગના પહેલા જ બોલ પર શાનદાર છગ્ગો ફટકારીને પોતાના ઈરાદા સ્પષ્ટ કરી દીધા હતા. જોકે, તે 6 બોલમાં 1 ચોગ્ગા અને 1 છગ્ગાની મદદથી 12 રન બનાવીને 13 રનના સ્કોર પર આઉટ થઈ હતી. ત્યારબાદ 18 રનના સ્કોર પર પ્રતિકા રાવલ (3 બોલમાં 4 રન) અને 28 રનના સ્કોર પર સ્ટાર બેટ્સમેન સ્મૃતિ મંધાના (11 બોલમાં 9 રન) પેવેલિયન પરત ફરી હતી. પાકિસ્તાનની કેપ્ટન ફાતિમાએ શાનદાર બોલિંગ કરતા ભારતની આ 3 વિકેટ ઝડપીને થોડી આશા જગાવી હતી.