અમદાવાદ હવામાન વિભાગે રાજ્ય માટે આગામી સાત દિવસની લેટેસ્ટ આગાહી કરી છે. આ આગાહી મુજબ રાજ્યના છૂટાછવાયા વિસ્તારોમાં હળવાથી મધ્યમ વરસાદ પડી શકે છે. ખાસ કરીને આજે અને આવતીકાલે અનેક વિસ્તારોમાં ગાજવીજ સાથે વરસાદની શક્યતા વ્યક્ત કરવામાં આવી છે. સાથે જ દરિયાકાંઠાના વિસ્તારો માટે માછીમારોને આજે દરિયો ન ખેડવાની સલાહ પણ આપવામાં આવી છે.
હવામાન વિભાગના જણાવ્યા અનુસાર આજે તેમજ આવતીકાલે રાજ્યના વિવિધ જિલ્લાઓમાં ગાજવીજ, વીજળીના ચમકારા અને પવન સાથે હળવાથી મધ્યમ વરસાદ વરસી શકે છે. લોકોને ખરાબ હવામાન દરમિયાન સાવચેતી રાખવાની અપીલ કરવામાં આવી છે. હવામાન વિભાગના જણાવ્યા મુજબ આજે અરવલ્લી, મહિસાગર, દાહોદ, છોટાઉદેપુર, વડોદરા, નર્મદા, ભરૂચ, સુરત, તાપી, નવસારી, વલસાડ અને ડાંગ જિલ્લામાં હળવાથી મધ્યમ વરસાદની શક્યતા છે. આ ઉપરાંત કેન્દ્રશાસિત પ્રદેશ દમણ તેમજ દાદરા અને નગર હવેલીમાં પણ વરસાદ પડી શકે છે.
8 અને 9 ઓગસ્ટે ભારે વરસાદની શક્યતા
હવામાન વિભાગે 8 અને 9 ઓગસ્ટ દરમિયાન રાજ્યના કેટલાક વિસ્તારોમાં ભારે વરસાદની આગાહી કરી છે. વરસાદી સિસ્ટમ સક્રિય રહેવાના કારણે અનેક જિલ્લાઓમાં ગાજવીજ સાથે વરસાદ પડી શકે છે. 8 ઓગસ્ટે રાજ્યના વિવિધ વિસ્તારો માટે યલો એલર્ટ પણ જાહેર કરવામાં આવ્યું છે. હવામાન વિભાગે 8 અને 9 ઓગસ્ટ માટે ભારે વરસાદની ખાસ આગાહી કરી છે. 8 ઓગસ્ટે ઉત્તર ગુજરાતના સાબરકાંઠા અને અરવલ્લી જિલ્લામાં ભારે વરસાદની શક્યતા છે. જ્યારે 9 ઓગસ્ટે વાવ-થરાદ, બનાસકાંઠા, સાબરકાંઠા અને અરવલ્લી જિલ્લામાં ગાજવીજ સાથે ભારે વરસાદને ધ્યાનમાં રાખીને યલો એલર્ટ જાહેર કરવામાં આવ્યું છે.આગામી 7 દિવસ સુધી વરસાદી માહોલ
હવામાન વિભાગની આગાહી મુજબ આગામી સાત દિવસ દરમિયાન ગુજરાતના છૂટાછવાયા વિસ્તારોમાં હળવાથી મધ્યમ વરસાદનું વાતાવરણ યથાવત રહેશે. કેટલાક વિસ્તારોમાં ટૂંકા ગાળાના વરસાદી ઝાપટાં પણ પડી શકે છે.
માછીમારોને દરિયો ન ખેડવાની સૂચના
દરિયામાં પવનની ગતિ વધવાની શક્યતાને ધ્યાનમાં રાખીને આજે માછીમારોને દરિયો ન ખેડવાની સલાહ આપવામાં આવી છે. દરિયાકાંઠાના વિસ્તારોમાં રહેતા લોકોને પણ સાવચેતી રાખવા સૂચના અપાઈ છે.
મોન્સૂન ટ્રફ અને વેસ્ટર્ન ડિસ્ટર્બન્સની અસર
હવામાન વિભાગના જણાવ્યા મુજબ સક્રિય મોન્સૂન ટ્રફ અને વેસ્ટર્ન ડિસ્ટર્બન્સના કારણે રાજ્યમાં વરસાદી માહોલ સર્જાયો છે. આ બંને સિસ્ટમના પ્રભાવને કારણે આગામી દિવસોમાં પણ રાજ્યના અનેક વિસ્તારોમાં વરસાદની સંભાવના રહેશે.
રાજ્યમાં 1 જૂનથી 7 ઓગસ્ટ સુધી કુલ 481 મિમી વરસાદ નોંધાયો છે. આ સિઝનમાં અત્યાર સુધીમાં સામાન્ય સરેરાશની સરખામણીએ 11 ટકા વધુ વરસાદ નોંધાતા જળાશયો અને ખેતી માટે અનુકૂળ પરિસ્થિતિ સર્જાઈ છે.