હવામાન વિભાગના અનુમાન પ્રમાણે ગુજરાતમાં ચોમાસાનો માહોલ હજુ યથાવત રહેશે. ઉત્તર-પૂર્વ ઉત્તર પ્રદેશ તરફ બનેલી લો-પ્રેશર સિસ્ટમ તેમજ ગુજરાત નજીક સક્રિય અપર એર સાયક્લોનિક સર્ક્યુલેશનની અસર જોવા મળી રહી છે. દક્ષિણ-પશ્ચિમ તરફથી આવતા ભેજવાળા પવનોને કારણે રાજ્યના વિવિધ ભાગોમાં વાદળછાયું વાતાવરણ રહેવાની શક્યતા છે.આગામી દિવસોમાં ખાસ કરીને દક્ષિણ ગુજરાત, ઉત્તર ગુજરાત તેમજ સૌરાષ્ટ્ર-કચ્છના અનેક વિસ્તારોમાં હળવાથી મધ્યમ વરસાદ પડી શકે છે. કેટલાક વિસ્તારોમાં ગાજવીજ સાથે વરસાદી ઝાપટાં પડવાની પણ સંભાવના છે. ત્યારે રક્ષાબંધનના દિવસે મુસાફરી કરનારાઓએ ખાસ સાવચેતી રાખવી પડશે.
રક્ષાબંધનના દિવસે દક્ષિણ ગુજરાતના અનેક જિલ્લાઓમાં વરસાદી માહોલ રહેવાની આગાહી છે. છોટાઉદેપુર, નર્મદા, સુરત, ડાંગ, તાપી, નવસારી અને વલસાડમાં કેટલાક સ્થળોએ ગાજવીજ સાથે હળવાથી મધ્યમ વરસાદ પડી શકે છે.વડોદરા અને ભરૂચમાં પણ છૂટાછવાયા વિસ્તારોમાં વરસાદ થવાની સંભાવના છે.આથી બહેનો રાખડી બાંધવા માટે ઘરેથી નીકળે ત્યારે વરસાદની સ્થિતિને ધ્યાનમાં રાખે તે જરૂરી છે.ખાસ કરીને ગાજવીજ થાય ત્યારે ખુલ્લા વિસ્તારોમાં વધુ સમય ન રોકાવાની સલાહ માનવી હિતાવહ રહેશે.
ઉત્તર ગુજરાતમાં પણ આજે કેટલાક વિસ્તારોમાં વરસાદની આગાહી કરવામાં આવી છે. બનાસકાંઠા, વાવ-થરાદ, પાટણ, મહેસાણા, સાબરકાંઠા, ગાંધીનગર અને અરવલ્લીમાં છૂટાછવાયા સ્થળોએ હળવાથી મધ્યમ વરસાદ પડી શકે છે.આ ઉપરાંત ખેડા, અમદાવાદ, આણંદ, પંચમહાલ, દાહોદ અને મહીસાગરમાં પણ વરસાદી માહોલ જોવા મળી શકે છે.જોકે દરેક વિસ્તારમાં એકસરખો વરસાદ પડે તે જરૂરી નથી.કેટલાક સ્થળોએ માત્ર વરસાદી ઝાપટાં પડી શકે છે જ્યારે અન્ય વિસ્તારોમાં વાતાવરણ વાદળછાયું રહી શકે છે.
સૌરાષ્ટ્ર અને કચ્છના અનેક વિસ્તારોને પણ આજે વરસાદથી રાહત મળી શકે છે. સુરેન્દ્રનગર, રાજકોટ, જામનગર, પોરબંદર, જૂનાગઢ, અમરેલી અને ભાવનગરમાં કેટલાક સ્થળોએ વરસાદ થવાની શક્યતા છે.મોરબી, દ્વારકા, ગીર સોમનાથ, બોટાદ અને કચ્છમાં પણ છૂટાછવાયા સ્થળોએ વરસાદી ઝાપટાં પડી શકે છે.આ ઉપરાંત દીવમાં પણ વરસાદની સંભાવના વ્યક્ત કરવામાં આવી છે.રક્ષાબંધન નિમિત્તે મુસાફરી કરનારાઓએ રસ્તામાં વરસાદી સ્થિતિ સર્જાય તો વાહન ચલાવતી વખતે ખાસ તકેદારી રાખવી જોઈએ.