ગુજરાતમાં ભારે વરસાદની આગાહીને ધ્યાનમાં રાખીને રાજ્ય સરકાર અને જિલ્લા વહીવટી તંત્ર દ્વારા સાવચેતીના ભાગરૂપે અનેક મહત્વપૂર્ણ નિર્ણયો લેવામાં આવ્યા છે. વિદ્યાર્થીઓની સલામતીને સર્વોચ્ચ પ્રાથમિકતા આપતા નવસારી, અમદાવાદ અને વડોદરા જિલ્લામાં આવતીકાલે શાળાઓ, કોલેજો, ITI અને અન્ય શૈક્ષણિક સંસ્થાઓમાં રજા જાહેર કરવામાં આવી છે. સાથે જ સમગ્ર રાજ્યમાં વહીવટી તંત્રને સતર્ક રહેવા માટે સૂચનાઓ આપવામાં આવી છે.
નવસારી જિલ્લામાં ભારે વરસાદની આગાહીને પગલે જિલ્લા તંત્ર સંપૂર્ણ એલર્ટ પર આવી ગયું છે. જિલ્લા શિક્ષણ અધિકારી (DEO) દ્વારા તમામ શાળા અને કોલેજોને પત્ર લખીને રજા જાહેર કરવાની જાણ કરવામાં આવી છે. જિલ્લાના તમામ શાળા અને કોલેજોમાં રજા જાહેર કરવામાં આવી છે. ઉપરાંત ITI તેમજ આંગણવાડીઓમાં વિદ્યાર્થીઓને બપોરે 2 વાગ્યા પછી રજા આપવા માટે પણ સૂચના આપવામાં આવી છે. વરસાદી પરિસ્થિતિમાં કોઈ અનિચ્છનીય ઘટના ન બને તે માટે આ નિર્ણય લેવામાં આવ્યો હોવાનું જણાવાયું છે.
અમદાવાદ જિલ્લામાં પણ ભારે વરસાદની આગાહીને ધ્યાનમાં રાખીને આવતીકાલે તમામ શાળાઓમાં રજા જાહેર કરવામાં આવી છે. જિલ્લા કલેક્ટરના આદેશ બાદ જિલ્લા શિક્ષણ અધિકારી (DEO) દ્વારા સત્તાવાર પરિપત્ર જાહેર કરવામાં આવ્યો છે. વિદ્યાર્થીઓની સલામતીને ધ્યાનમાં રાખીને આ નિર્ણય લેવામાં આવ્યો છે. ભારે વરસાદ દરમિયાન વિદ્યાર્થીઓને અવરજવર કરવામાં મુશ્કેલી ન પડે અને કોઈ જોખમ ઊભું ન થાય તે માટે વહીવટી તંત્રે સમયસર આ પગલું ભર્યું છે.
બીજી તરફ સમગ્ર રાજ્યમાં ભારે વરસાદની આગાહીને લઈને ગાંધીનગરમાં સ્ટેટ ઈમરજન્સી ઓપરેશન સેન્ટરમાં મહત્વપૂર્ણ બેઠક યોજાઈ હતી. આ બેઠકમાં ભારે વરસાદથી પ્રભાવિત થઈ શકે એવા જિલ્લાઓના કલેક્ટર્સ સાથે વિસ્તૃત ચર્ચા કરવામાં આવી હતી. બેઠક દરમિયાન તમામ જિલ્લા વહીવટીતંત્રને સંપૂર્ણ સતર્ક રહેવા માટે સૂચના આપવામાં આવી હતી.