ભારત સરકારે દેશના સૈન્ય નેતૃત્વમાં એક મહત્વપૂર્ણ ફેરફાર કરતા લેફ્ટનન્ટ જનરલ એન. એસ. રાજા સુબ્રમણી (રિટાયર્ડ) ને નવા ચીફ ઓફ ડિફેન્સ સ્ટાફ (CDS) તરીકે નિયુક્ત કર્યા છે. તેઓ સૈન્ય બાબતોના વિભાગના સચિવ તરીકે પણ જવાબદારી સંભાળશે. લેફ્ટનન્ટ જનરલ સુબ્રમણી કાર્યભાર સંભાળવાની તારીખથી આગામી આદેશ સુધી આ પદ પર રહેશે. ઉલ્લેખનીય છે કે હાલના ચીફ ઓફ ડિફેન્સ સ્ટાફ જનરલ અનિલ ચૌહાણ 30 મે 2026 ના રોજ પોતાનો કાર્યકાળ પૂર્ણ કરશે.
કોણ છે લેફ્ટનન્ટ જનરલ એન. એસ. રાજા સુબ્રમણી?
લેફ્ટનન્ટ જનરલ સુબ્રમણી ભારતીય સેનાના અત્યંત અનુભવી અને સન્માનિત અધિકારી રહ્યા છે. તેમને PVSM, AVSM, SM અને VSM જેવા પ્રતિષ્ઠિત સૈન્ય મેડલોથી નવાજવામાં આવ્યા છે. હાલમાં તેઓ 1 સપ્ટેમ્બર 2025 થી રાષ્ટ્રીય સુરક્ષા પરિષદ સચિવાલય (NSCS) માં સૈન્ય સલાહકાર તરીકે કાર્યરત છે.
આ અગાઉ તેઓ 1 જુલાઈ 2024 થી 31 જુલાઈ 2025 સુધી થલ સેનાના નાયબ વડા (Vice Chief of Army Staff) રહ્યા હતા. માર્ચ 2023 થી જૂન 2024 સુધી તેમણે સેન્ટ્રલ કમાન્ડના જનરલ ઓફિસર કમાન્ડિંગ-ઈન-ચીફ તરીકેની કમાન સંભાળી હતી.
ચીફ ઓફ ડિફેન્સ સ્ટાફ (CDS) એ ભારતીય સશસ્ત્ર દળો — આર્મી, નેવી અને એરફોર્સ વચ્ચે બહેતર સંકલન સ્થાપિત કરવા માટેનું સર્વોચ્ચ પદ છે. તેઓ સરકાર માટે મુખ્ય સૈન્ય સલાહકાર તરીકે કાર્ય કરે છે અને સંરક્ષણ ક્ષેત્રમાં સુધારા તેમજ ‘થિયેટર કમાન્ડ’ ની દિશામાં મહત્વપૂર્ણ ભૂમિકા ભજવે છે. જનરલ અનિલ ચૌહાણના નિવૃત્ત થયા પછી, લેફ્ટનન્ટ જનરલ સુબ્રમણી પર ભારતીય સંરક્ષણ તંત્રને વધુ આધુનિક અને એકીકૃત બનાવવાની જવાબદારી રહેશે.