સરકારે નાણાકીય વર્ષ 2024-25 માટે કર્મચારી ભવિષ્ય નિધિ પર 8.25 ટકા વ્યાજ દરને મંજૂરી આપી છે. આ સાથે, EPFO તેના 7 કરોડથી વધુ ગ્રાહકોના ભવિષ્ય નિધિ પર વાર્ષિક વ્યાજ જમા કરી શકશે. તમને જણાવી દઈએ કે, 28 ફેબ્રુઆરીના રોજ, કર્મચારી ભવિષ્ય નિધિ સંગઠન (EPFO) એ નાણાકીય વર્ષ 2024-25 માટે કર્મચારી ભવિષ્ય નિધિ (EPF) થાપણો પર 8.25 ટકા વ્યાજ દર જાળવી રાખવાનો નિર્ણય લીધો હતો. આ પાછલા નાણાકીય વર્ષમાં આપેલા વ્યાજ દર જેટલું છે. નિશ્ચિત વ્યાજ દર નાણા મંત્રાલયની મંજૂરી માટે મોકલવામાં આવ્યો હતો.
શ્રમ મંત્રાલયના એક અધિકારીએ જણાવ્યું હતું કે, “નાણા મંત્રાલય નાણાકીય વર્ષ 2024-25 માટે EPF પર 8.25 ટકા વ્યાજ દર આપવા માટે સંમત થયું છે અને શ્રમ મંત્રાલયે ગુરુવારે EPFO ને આ સંદર્ભમાં જાણ કરી છે.” હવે નાણાકીય વર્ષ 2024-25 માટે મંજૂર કરાયેલા દર મુજબનું વ્યાજ સાત કરોડથી વધુ EPFO સબ્સ્ક્રાઇબર્સના ખાતામાં જમા કરવામાં આવશે. કેન્દ્રીય શ્રમ અને રોજગાર મંત્રી મનસુખ માંડવિયાની અધ્યક્ષતામાં 28 ફેબ્રુઆરીએ નવી દિલ્હીમાં EPFOના સેન્ટ્રલ બોર્ડ ઓફ ટ્રસ્ટીની 237મી બેઠકમાં વ્યાજ દર અંગેનો નિર્ણય લેવામાં આવ્યો હતો.
ફેબ્રુઆરી 2024માં, EPFO એ 2023-24 માટે વ્યાજ દર 2022-23માં 8.15 ટકાથી વધારીને 8.25 ટકા કર્યો હતો. તે જ સમયે, માર્ચ 2022માં, 2021-22 માટે EPF પર વ્યાજ ઘટાડીને 8.1 ટકા કરવામાં આવ્યું હતું, જે ચાર દાયકાથી વધુ સમયનું સૌથી નીચું સ્તર છે. 2020-21માં તે 8.5 ટકા હતો.
આ પણ વાંચો, CORONA: દેશમાં કેમ વધી રહ્યાં છે કોરોનાના કેસ? જાણો અત્યાર સુધીમાં કેટલાં કેસ નોંધાઇ ચૂક્યાં