અમદાવાદમાં કેન્દ્રીય ગૃહમંત્રી અમિત શાહે સાબરમતીથી મહેસાણા વચ્ચે દેશની પ્રથમ LNG ટ્રેનને લીલીઝંડી આપી પ્રારંભ કરાવ્યો છે. આ ટ્રેનનું એન્જિન જરૂરિયાત મુજબ LNG અને ડીઝલ વચ્ચે સ્વિચ કરી શકાશે. આ વિશેષ ટ્રેનની શરૂઆત કરતા પહેલા સાબરમતીથી મહેસાણા વચ્ચે 8 મહિના સુધી સફળ ટ્રાયલ કરવામાં આવ્યું હતું.
આ પ્રસંગે પોતાના સંબોધનમાં ગૃહમંત્રી અમિત શાહે સાબરમતી રેલવે સ્ટેશનના નવીનીકરણ અને તેની થયેલી કાયાપલટ અંગે ખુશી વ્યક્ત કરતા રેલ મંત્રી અને રેલવે મંત્રાલયને અભિનંદન પાઠવ્યા હતા. તેમણે જણાવ્યું હતું કે, કવચ પ્રણાલીના કારણે હવે મુસાફરોની મુસાફરી વધુ સુરક્ષિત બનશે.
કાર્યક્રમ દરમિયાન રૂ. 700 કરોડના ખર્ચે તૈયાર થયેલા WAG-12ના મેઈન્ટેનન્સ શેડનો શુભારંભ કરવામાં આવ્યો હતો. ગૃહમંત્રીએ ઉમેર્યું હતું કે WAG-12નું એક એન્જિન 600 ટ્રકનો સામાન એકસાથે લઈ જવાની ક્ષમતા ધરાવે છે અને તાજેતરમાં ડબલ ડેકર માલગાડીનું પરિક્ષણ પણ સફળ રહ્યું છે.
અમદાવાદ રેલવે ડિવિઝનના જણાવ્યા અનુસાર, ભારતીય રેલવે પ્રથમ વખત ટ્રેનના ડ્રાઇવિંગ પાવર કાર (DPC)માં LNG આધારિત ફ્યુઅલ સિસ્ટમનો ઉપયોગ કરી રહ્યું છે. આ ટેક્નોલોજીમાં એન્જિન LNG અને ડીઝલ બંનેથી ચાલી શકે છે. ઇંધણની ઉપલબ્ધતાના આધારે એન્જિન બંનેમાંથી કોઈ એક ઇંધણનો ઉપયોગ કરી શકશે.
2,000 કિલોમીટરથી વધુનું ફિલ્ડ ટ્રાયલ પૂર્ણ
આ પ્રોજેક્ટ હેઠળ 2 ડ્રાઇવિંગ પાવર કારને LNG-ડીઝલ ડ્યુઅલ-ફ્યુઅલ સિસ્ટમમાં રૂપાંતરિત કરવામાં આવી છે. દરેક DPCની ક્ષમતા 1,400 હોર્સપાવર છે. રેલવેના જણાવ્યા અનુસાર, બંને કન્વર્ટેડ DPC પર અત્યાર સુધી 2,000 કિલોમીટરથી વધુનું ફિલ્ડ ટ્રાયલ પૂર્ણ કરવામાં આવ્યું છે. ટ્રાયલ દરમિયાન નવી ટેક્નોલોજીની ક્ષમતા અને વિશ્વસનીયતાની પણ તપાસ કરવામાં આવી છે. રેલવે અનુસાર, આ સિસ્ટમ ડીઝલની જગ્યાએ લગભગ 40% સુધી LNGનો ઉપયોગ કરી શકે છે.
60% ડીઝલનો થશે ઉપયોગ
તમને જણાવી દઈએ કે આ ટ્રેન સંપૂર્ણપણે LNG પર નિર્ભર નહીં રહે. ડ્યુઅલ-ફ્યુઅલ સિસ્ટમના કારણે એન્જિન જરૂરિયાત મુજબ LNG અને ડીઝલ બંને પર ચાલી શકશે. LNG ઉપલબ્ધ ન હોય તેવી સ્થિતિમાં ટ્રેનને ડીઝલથી પણ ચલાવી શકાશે. તેનાથી ઓપરેશન દરમિયાન ઇંધણની ઉપલબ્ધતા સાથે જોડાયેલી મુશ્કેલી પણ ઘટવાની આશા છે. રેલવેના જણાવ્યા અનુસાર, LNGના ઉપયોગથી ટ્રેનને ઇંધણ ભરાવ્યા પહેલાં વધુ અંતર કાપવામાં પણ મદદ મળી શકે છે.
રેલવેનું કહેવું છે કે LNGના ઉપયોગથી ડીઝલનો વપરાશ અને એન્જિનમાંથી થતા કાર્બન ઉત્સર્જનમાં ઘટાડો થશે. તેનાથી કાર્બન ડાયોક્સાઇડ (CO₂), નાઇટ્રોજન ઓક્સાઇડ (NOx) અને પાર્ટિક્યુલેટ મેટર (PM) જેવા પ્રદૂષકોને ઘટાડવામાં મદદ મળશે.