ગુજરાતમાં આગામી સ્થાનિક સ્વરાજ્યની ચૂંટણીઓનો ધમધમાટ શરૂ થઈ ગયો છે. આ દરમિયાન રાજ્ય ચૂંટણી પંચ દ્વારા ઉમેદવાર દીઠ ચૂંટણી ખર્ચની નવી મર્યાદા નક્કી કરવામાં આવી છે. વર્ષ 2021ના જૂના ઠરાવમાં સુધારો કરીને મોંઘવારી અને વર્તમાન સ્થિતિને ધ્યાને રાખી આ મર્યાદામાં નોંધપાત્ર વધારો કરવામાં આવ્યો છે.
નવા નિયમો મુજબ, મ્યુનિસિપલ કોર્પોરેશનની ચૂંટણીમાં હવે ઉમેદવાર 9 લાખ રૂપિયા સુધીનો ખર્ચ કરી શકશે, જે અગાઉ માત્ર 6 લાખ રૂપિયા હતો. તેવી જ રીતે, જિલ્લા પંચાયતની ચૂંટણીમાં ઉમેદવાર દીઠ ખર્ચ મર્યાદા વધારીને રૂ. 6 લાખ રૂપિયા કરવામાં આવી છે.
શા માટે લેવાયો આ નિર્ણય?
રાજ્ય ચૂંટણી પંચ દ્વારા છેલ્લે 2021માં ખર્ચ મર્યાદામાં સુધારો કરવામાં આવ્યો હતો. મ્યુનિસિપલ કોર્પોરેશનથી લઈને છેક ગ્રામ પંચાયત સુધીની ચૂંટણીઓમાં પ્રચારના સાધનો, સોશિયલ મીડિયા માર્કેટિંગ અને અન્ય ખર્ચાઓ વધતા ઉમેદવારો દ્વારા મર્યાદા વધારવાની માંગ કરવામાં આવતી હતી. આ નિર્ણયથી ઉમેદવારો હવે વધુ વ્યવસ્થિત રીતે પ્રચાર કરી શકશે, પરંતુ સાથે જ તેમણે આ ખર્ચનો સચોટ હિસાબ પંચને આપવો પડશે. આગામી દિવસોમાં જ્યારે ચૂંટણીનો જંગ જામશે, ત્યારે આ નવી મર્યાદા ઉમેદવારો માટે રાહતરૂપ સાબિત થશે.
https://www.instagram.com/timenewsguj