આજથી શરૂ થનાર બજેટ સત્ર ખૂબ જ તોફાની રહેવાની ધારણા છે. ખાસ કરીને બજેટ પછી સંસદમાં વધુ હંગામો જોવા મળી શકે છે. ગુરુવારે બોલાવાયેલી સર્વપક્ષીય બેઠકમાં તેના સંકેતો સ્પષ્ટપણે જોવા મળ્યા હતા.
મહાકુંભના અરાજકતા પર ચર્ચાની માંગ
સત્ર શરૂ થાય તે પહેલાં પ્રયાગરાજમાં આયોજિત મહાકુંભમાં થયેલી ભાગદોડ અંગે વિપક્ષી પક્ષોએ સ્પષ્ટપણે કહ્યું હતું કે સરકારે આ અંગે ચર્ચા કરવી જોઈએ. જોકે, સરકારે બેઠકમાં સ્પષ્ટ કર્યું છે કે આ રાજ્યનો વિષય છે અને તે તેના પર વિચાર કરી રહી છે. આમ છતાં જ્યારે વિપક્ષે વારંવાર મહાકુંભમા અવ્યવસ્થા પર ચર્ચાની માંગ કરી ત્યારે સરકારે કહ્યું કે આનો નિર્ણય બિઝનેસ સલાહકાર સમિતિ દ્વારા લેવામાં આવશે.
બજેટ સત્રની શરૂઆત રાષ્ટ્રપતિ દ્રૌપદી મુર્મુના સંબોધનથી થશે. આ પછી નાણામંત્રી નિર્મલા સીતારમણ બંને ગૃહોમાં આર્થિક સર્વે 2025 રજૂ કરશે. આ એક મહત્વપૂર્ણ દસ્તાવેજ છે જે દેશની અર્થવ્યવસ્થાની સ્થિતિ અને દિશા જણાવે છે.
રાષ્ટ્રપતિના સંબોધન અને આર્થિક સર્વેક્ષણ એક દિવસ પછી રજૂ થનારા કેન્દ્રીય બજેટ વિશે કેટલાક મહત્વપૂર્ણ સૂચકાંકો પણ પ્રદાન કરે છે. નાણામંત્રી સીતારમણ શનિવારે (1 ફેબ્રુઆરી) 2025-26નું સામાન્ય બજેટ રજૂ કરશે. એવું માનવામાં આવે છે કે સામાન્ય બજેટ દેશના અર્થતંત્રમાં રહેલી મંદીને દૂર કરવા તેમજ સ્થાનિક અર્થતંત્રમાં માંગ અને રોજગાર વધારવાના પગલાં પર ધ્યાન કેન્દ્રિત કરશે.