1 મેથી કોમર્શિયલ LPG સિલિન્ડરના ભાવમાં તોતિંગ વધારો થયો છે, જેના કારણે હોટલ અને રેસ્ટોરન્ટ માલિકોની ચિંતા વધી છે. જોકે, રાહતની વાત એ છે કે ઘરેલુ LPG સિલિન્ડરના ભાવ સ્થિર રહ્યા છે
આજે સવારે મે મહિનાની શરૂઆત સાથે 19 કિલોગ્રામના કોમર્શિયલ LPG સિલિન્ડરના ગ્રાહકોને મોટો ફટકો પડ્યો છે. ઇન્ડિયન ઓઇલ (IOC) દ્વારા જાહેર કરાયેલા નવા દરો અનુસાર, દિલ્હીમાં કોમર્શિયલ સિલિન્ડરના ભાવમાં 993 રૂપિયાનો વધારો કરવામાં આવ્યો છે. આ ફેરફાર સાથે દિલ્હીમાં એક સિલિન્ડરની કિંમત હવે 2078 રૂપિયાથી વધીને 3071.50 રૂપિયા થયો છે. તેવી જ રીતે, મુંબઈ અને કોલકાતામાં પણ ભાવમાં વધારો થયો છે.રાહતની વાત એ છે કે 14.2 કિલોગ્રામના ઘરેલુ LPG સિલિન્ડરનો ભાવ યથાવત છે. દિલ્હીમાં ઘરેલુ સિલિન્ડર 913ના જૂના દરે ઉપલબ્ધ છે.
એએનઆઈના રિપોર્ટ અનુસાર, ઘરેલુ LPG કિંમતોમાં કોઈ વધારો થયો નથી. છેલ્લો વધારો આ વર્ષની 7 માર્ચે થયો હતો. હાલમાં દિલ્હીમાં LPGની કિંમત ₹913 છે. મુંબઈમાં 14.2 કિલો LPGની કિંમત ₹912.50 છે. ચેન્નઈમાં, 14.2 કિલો LPGની કિંમત ₹928.50 છે. કોલકાતામાં એક સિલિન્ડરની કિંમત ₹939 છે.
ઈરાન-યુએસ તણાવની અસર
નોંધનીય છે કે અમેરિકા અને ઈરાન વચ્ચેના તણાવને કારણે હોર્મુઝ સ્ટ્રેટ જ્યાંથી ભારત મોટા પ્રમાણમાં ગેસ અને તેલની આયાત કરે છે, તે બ્લોક છે. હોર્મુઝ સ્ટ્રેટ બંધ થવાથી ગેસ અને તેલનો પુરવઠો ઓછો થયો છે, જેના કારણે ભારતને અન્ય સ્ત્રોતોમાંથી તેની આયાત વધારવાની ફરજ પડી છે. આના કારણે ખર્ચમાં વધારો થયો છે અને પુરવઠા પર દબાણ આવ્યું છે. આના કારણે ગેસના ભાવમાં વધારો થયો છે.
દેશની આર્થિક રાજધાની મુંબઈમાં આજથી કોમર્શિયલ LPG સિલિન્ડરનો ભાવ 3,024 પર પહોંચી ગયો છે. અગાઉ તે પ્રતિ સિલિન્ડર 2,031 રૂપિયામાં ઉપલબ્ધ હતો. જોકે, અહીં ઘરેલુ સિલિન્ડરનો ભાવ 912.50 રૂપિયા પર સ્થિર છે. પશ્ચિમ બંગાળના ચૂંટણી રાજ્યની રાજધાની કોલકાતામાં કોમર્શિયલ LPG સિલિન્ડરનો ભાવ હવે 2,208 રૂપિયાથી વધીને 3,202 રૂપિયા પર પહોંચી ગયો છે. અહીં LPGના ભાવમાં પણ આશરે 990 રૂપિયાનો વધારો થયો છે. રાજસ્થાનની રાજધાની જયપુરમાં કોમર્શિયલ સિલિન્ડરનો ભાવ 3,099 રૂપિયા પર પહોંચી ગયો છે, જે પહેલા 2,031 રૂપિયા હતો. જોકે, ઘરેલુ સિલિન્ડર હજુ પણ 916.5 રૂપિયામાં વેચાઈ રહ્યો છે.