પશ્ચિમ બંગાળમાં ચૂંટણી પ્રચારનો શોરબકોર હવે શાંત થઈ ગયો છે. પશ્ચિમ બંગાળ વિધાનસભા ચૂંટણીના બીજા અને અંતિમ તબક્કાની બેઠકો માટે પ્રચાર પડઘમ શાંત થયા બાદ, ભારતીય જનતા પાર્ટી (BJP)ના સૌથી મોટા ચહેરા વડાપ્રધાન નરેન્દ્ર મોદી હવે સિક્કિમ પહોંચી ગયા છે. બે દિવસના પ્રવાસે સિક્કિમ પહોંચેલા PM મોદી મંગળવારે વહેલી સવારે ગંગટોકમાં યુવાનો વચ્ચે જોવા મળ્યા હતા.
વડાપ્રધાન નરેન્દ્ર મોદી ફૂટબોલના મેદાનમાં પણ ઉતર્યા અને યુવાનો સાથે ફૂટબોલ રમ્યા. ફૂટબોલના મેદાનની તસવીરો શેર કરતા PM મોદીએ સોશિયલ મીડિયા પ્લેટફોર્મ ‘X’ પર લખ્યું કે, “સિક્કિમમાં મારા યુવા મિત્રો સાથે ગંગટોકની સુંદર સવારમાં ફૂટબોલ રમવા જેવો બીજો કોઈ આનંદ નથી.” આ તસવીરોમાં PM મોદી યુવાનો સાથે ફૂટબોલ રમતા નજરે પડે છે.
PM મોદીનું યુવાનો વચ્ચે પહોંચીને ફૂટબોલ રમવું અને તેની તસવીરો શેર કરવી એ પશ્ચિમ બંગાળને સાધવાની રણનીતિ તરીકે પણ જોવામાં આવી રહ્યું છે. હકીકતમાં, સિક્કિમની સાથે પશ્ચિમ બંગાળમાં પણ ફૂટબોલ ખૂબ જ લોકપ્રિય છે. પશ્ચિમ બંગાળની રાજધાની કોલકાતા ભારતમાં ક્લબ ફૂટબોલનું મોટું કેન્દ્ર છે, જ્યારે ગામડાના સ્તર સુધી ફૂટબોલ ક્લબોનું અસ્તિત્વ છે.
PM મોદીના ગોલ પર ખેલાડીઓએ વગાડી તાળીઓ
પશ્ચિમ બંગાળમાં ફૂટબોલ કેટલું લોકપ્રિય છે, તેનો અંદાજ એ વાત પરથી લગાવી શકાય છે કે ફૂટબોલ વર્લ્ડ કપ જેવી મોટી આંતરરાષ્ટ્રીય ઈવેન્ટ્સ વખતે રસ્તાઓ પર ટ્રાફિક જાણે થંભી જાય છે. ચૂંટણી પ્રચાર પૂરો થયા બાદ વડાપ્રધાન મોદી ફૂટબોલના મેદાનમાં ઉતર્યા, ગોલ કરીને સેલિબ્રેશન કર્યું અને તસવીરો શેર કરી, જેને ફૂટબોલની આ લોકપ્રિયતાને વટાવવાની અને ‘સંકેતની રાજનીતિ’ કરવાની રણનીતિ સાથે જોડીને જોવામાં આવી રહ્યું છે.
નોંધનીય છે કે PM મોદી બે દિવસના પ્રવાસે સિક્કિમમાં છે. વડાપ્રધાન નરેન્દ્ર મોદીએ તેમના સિક્કિમ પ્રવાસના પ્રથમ દિવસે સોમવારે ગંગટોકમાં ભવ્ય રોડ શો કર્યો હતો. PM મોદીની એક ઝલક મેળવવા માટે મોટી સંખ્યામાં લોકો ઉમટી પડ્યા હતા અને રસ્તાની બંને બાજુ કતારબદ્ધ જોવા મળ્યા હતા. PM મોદી સિક્કિમના ભારતમાં વિલીનીકરણના 51 વર્ષ પૂર્ણ થવા પર આયોજિત કાર્યક્રમમાં પણ સામેલ થશે અને અંદાજે 4,000 કરોડ રૂપિયાની યોજનાઓનું લોકાર્પણ અને શિલાન્યાસ કરશે.