ટ્રમ્પ ભારતને ‘Miss’ કરે છે: PM મોદીને ફરી સૌથી ‘શ્રેષ્ઠ’ મિત્ર ગણાવ્યા, મોદીએ કહ્યું- અમે નેચરલ પાર્ટનર
અમેરિકાના રાષ્ટ્રપતિ ડોનાલ્ડ ટ્રમ્પે મંગળવારે કહ્યું કે તેમને વિશ્વાસ છે કે વોશિંગ્ટન અને દિલ્હી વચ્ચે ચાલી રહેલી વેપાર વાતચીત “સફળ પરિણામ” તરફ દોરી જશે. તેમણે વધુમાં કહ્યું કે તેઓ આગામી અઠવાડિયામાં તેમના “ખૂબ જ સારા મિત્ર” વડાપ્રધાન નરેન્દ્ર મોદી સાથે વાત કરવા આતુર છે.
રશિયાના તેલ અને ટેરિફને લઈને ભારત અને અમેરિકા વચ્ચેના સંબંધોમાં તણાવ છે. અમેરિકાના રાષ્ટ્રપતિ ડોનાલ્ડ ટ્રમ્પે ફરી એકવાર વડાપ્રધાન નરેન્દ્ર મોદીને ખૂબ જ સારા મિત્ર ગણાવ્યા છે. PM મોદીએ આનો જવાબ આપ્યો છે.
PM મોદીએ સોશિયલ મીડિયા પર પોસ્ટ કર્યું કે, ભારત અને અમેરિકા નજીકના મિત્રો અને નેચરલ પાર્ટનર છે. મને ખાતરી છે કે અમારી વેપાર વાતચીત ભારત-અમેરિકા ભાગીદારીની અમર્યાદિત શક્યતાઓનો માર્ગ ખોલશે. અમારી ટીમો શક્ય તેટલી વહેલી તકે આ દિશામાં ચર્ચા કરવા માટે કામ કરી રહી છે. હું રાષ્ટ્રપતિ ટ્રમ્પ સાથે વાત કરવા માટે પણ આશાવાદી છું. અમે બંને દેશોના લોકો માટે સુવર્ણ અને વધુ સમૃદ્ધ ભવિષ્ય બનાવવા માટે કામ કરીશું.
તમને જણાવી દઈએ કે અગાઉ યુએસ રાષ્ટ્રપતિ ડોનાલ્ડ ટ્રમ્પે સોશિયલ મીડિયા પ્લેટફોર્મ ટ્રુથ સોશિયલ પર પોસ્ટ કરીને કહ્યું હતું કે, તેમને જાહેરાત કરતા આનંદ થાય છે કે ભારત અને અમેરિકા વેપાર અવરોધોને દૂર કરવા માટે વાતચીત ચાલુ રાખી રહ્યા છે. તેમણે કહ્યું હતું કે હું આગામી અઠવાડિયામાં મારા ખૂબ જ સારા મિત્ર, વડાપ્રધાન મોદી સાથે વાત કરવા માટે આતુર છું. મને ખાતરી છે કે આ વાતચીત અમારા બંને મહાન દેશો માટે સફળ નિષ્કર્ષ લાવશે.
આ પણ વાંચો. શુભ સમાચારથી ભરેલો છે આજે આ એક રાશિનો દિવસ, મળશે ખુશીઓનો ભંડાર