ટ્રમ્પ ટેરિફથી શેરબજારમાં કડાકો, સેન્સેક્સમાં 600 પોઈન્ટનો ઘટાડો

 ગુરુવારે શેરબજાર ખુલતાની સાથે જ અમેરિકા તરફથી  લાદવામાં આવેલા 50 ટકા ટેરિફની અસર ભારત પર દેખાઈ હતી. બોમ્બે સ્ટોક એક્સચેન્જનો 30 શેરવાળો સેન્સેક્સ ઇન્ડેક્સ ભારે ઘટાડા સાથે ખુલ્યો અને 657 પોઈન્ટ ઘટીને 80,124ના સ્તરે પહોંચ્યો હતો. સેન્સેક્સની જેમ નિફ્ટીએ પણ તેના પાછલા બંધની તુલનામાં ઘટાડા સાથે ટ્રેડિંગ શરૂ કર્યું અને 180 પોઈન્ટથી વધુ ઘટીને 24,531ના સ્તરે પહોંચ્યો હતો. બજારમાં ઘટાડા વચ્ચે આઈટી-ટેક કંપનીઓ તેમજ બેંકિંગ શેરોમાં ઘટાડો થયો હતો

27 ઓગસ્ટના રોજ ભારત પર ટ્રમ્પ દ્વારા વધારાનો 25 ટકા ટેરિફ લાદવામાં આવ્યો હતો, પરંતુ ગણેશ ચતુર્થીના અવસર પર ભારતીય શેરબજાર બંધ થયું હતું. પરંતુ ગુરુવારે જ્યારે બજાર ખુલ્યું ત્યારે ટેરિફની સીધી અસર સેન્સેક્સ-નિફ્ટી પર જોવા મળી હતી. બીએસઈનો સેન્સેક્સ 80,754 પર ખુલ્યો, જે તેના અગાઉના બંધ 80,786.54થી નીચે ગયો અને પછી થોડીવારમાં તે 657.33 પોઈન્ટ ઘટીને 80,124 પર ટ્રેડ થતો જોવા મળ્યો. એનએસઈ નિફ્ટીની વાત કરીએ તો આ ઇન્ડેક્સ 24,695.80 પર ખુલ્યો, જે તેના અગાઉના બંધ 24,712.05થી 200 પોઈન્ટ ઘટીને 24,695.80 પર પહોંચ્યો અને પછી સેન્સેક્સની જેમ તે પણ ઝડપથી ઘટીને 24,512ના સ્તરે પહોંચ્યો હતો.

જ્યારે શેરબજાર ઘટાડા સાથે ટ્રેડિંગ શરૂ કર્યું, ત્યારે 1458 કંપનીઓના શેરમાં લાલ નિશાનમાં ટ્રેડિંગ શરૂ થયું. ઉપરાંત, 1023 કંપનીઓના શેર ગ્રીન ઝોનમાં ખુલ્યા હતા. આ ઉપરાંત 195 શેર એવા હતા જેમની શરૂઆત ફ્લેટ રહી હતી. શરૂઆતના ટ્રેડિંગ દરમિયાન જ્યારે શ્રીરામ ફાઇનાન્સ, ICICI, HCL ટેક, Jio ફાઇનાન્સ, NTPC અને HDFC બેંક તેમજ ઇન્ફોસિસના શેરમાં જોરદાર ઘટાડો થયો, ત્યારે હીરો મોટોકોર્પ, એશિયન પેઇન્ટ્સ અને ટાઇટન જેવા શેર ઘટી રહેલા બજારમાં પણ ગ્રીન ઝોનમાં જોવા મળ્યા હતા.