ઇસરો વધુ એક ઇતિહાસ રચવાની નજીક, બંને ઉપગ્રહ નજીક આવ્યાં

ISROના સ્પેસ ડોકિંગ એક્સપેરિમેન્ટ (SPADEX) માટે અવકાશમાં મોકલવામાં આવેલા બે ઉપગ્રહોને રવિવારે (12 જાન્યુઆરી) ત્રણ મીટરની નજીક લાવવામાં આવ્યા હતા. માહિતી આપતા, ISROએ કહ્યું કે SDX 01 (ચેઝર) અને SDX 02 (ટાર્ગેટ) ઉપગ્રહો હાલમાં સારી સ્થિતિમાં છે તેમને ડોકીંગ માટે નજીક લાવવામાં આવ્યા છે.

સ્પેડેક્સ ઉપગ્રહે આ સમયગાળા દરમિયાન અદ્ભુત ફોટા અને વીડિયો પણ લીધા છે. ઈસરોએ કહ્યું, “બંને ઉપગ્રહોને પહેલા 15 મીટર અને પછી 3 મીટર સુધી પહોંચાડવાનો એક પરીક્ષણ પ્રયાસ કરવામાં આવ્યો હતો.” બંનેને સુરક્ષિત અંતર પર પાછા લઈ જવામાં આવી રહ્યા છે. હવે પહેલા ડેટાનું વિશ્લેષણ કરવામાં આવશે, ત્યારબાદ ડોકીંગની પ્રક્રિયા પૂર્ણ કરવામાં આવશે.

ઇસરોએ સોશિયલ મીડિયા પર લખ્યું કે, “અમે એકબીજાને 15 મીટરના અંતરે સ્પષ્ટ રીતે જોઈ શકીએ છીએ. હવે અમે ડોકીંગ માટે માત્ર 50 ફૂટના અંતરે છીએ, આ મિશનનો હેતુ અવકાશમાં ડોકીંગ દર્શાવવા માટે નાના અવકાશયાનનો ઉપયોગ કરવાનો છે. અગાઉ સ્પેસ ડોકિંગ પ્રયોગ (SPADEX) 7 જાન્યુઆરી અને 9 જાન્યુઆરીએ ડોકીંગ પ્રયોગો માટે જાહેર કરાયેલ બે તારીખો ચૂકી ગયો છે.